Atyraýda joǵalǵan balanyń ata-anasy áleýmettik jeli arqyly tabyldy
ATYRAÝ. QazAqparat - Atyraýda joǵalyp qalǵan balanyń ata-anasy áleýmettik jeli arqyly tabyldy, dep habarlaıdy QazAqparat tilshisi.
«Tórt jasar bala qala kósheleriniń birinde kózge túsken. Ol jalǵyz ózi serýendep júrgen. Ol óziniń aty-jónin, qaıda turatynyn, jalǵyz ne istep júrgenin aıta almaǵan. Polıtseıler «102» qyzmetine habarlasqan, alaıda bala joǵalǵany týraly habar túspegen. Sol kezde onyń sýretin áleýmettik jelige jarııalaý týraly sheshim qabyldandy. Onyń ata-anasy bir saǵattan keıin tabyldy. Osy oqıǵadan keıin olarmen sóılesip, joǵalǵan ulyn qaıtaryp berdik», - dedi polıtsııa departamentiniń baspasóz hatshysy Nazymgúl Qaısaǵalıeva.
Belgili bolǵandaı, ata-anasy perzenthanadaǵy týysyna ketken kezde bala úıdiń aýlasynda oınap júrgen. Budan buryn ol úıinen uzap ketpegen. Osy joly belgisiz sebeptermen aýladan shyǵyp, adasyp ketken.
