Atyraýda joǵalǵan balalar tabyldy
ATYRAÝ. QazAqparat – Atyraýda Ulttyq ulannyń sarbazdary joǵalǵan balalardy taýyp, ata-analaryna tabystady, dep habarlaıdy QazAqparat.
Ulttyq gvardııanyń «Batys» óńirlik qosbasshylyǵy baspasóz qyzmetiniń málimetinshe, 13 maýsymda keshki saǵat 22:30-da Atyraý qalalyq Jedel basqarý ortalyǵyna eki balanyń anasy habarlasqan. Olar kórshi balalarmen oınaýǵa shyqqan perzentteri úıge oralmaǵanyn aıtqan.
«Joǵalǵan balalar týraly aqparat quqyq qorǵaý organdarynyń barlyq jeke quramyna berildi. Qatardaǵy patrýl bastyǵy Nazar Іzbasov pen quramynda patrýldik qatardaǵy sarbazdar Azamat Ismaılov pen Bekbolat Beısenbaev bar áskerı narıad «Jeńis» saıabaǵynyń janynda júrgen tórt balany baıqaǵan. Olar joǵalǵan balalardyń sıpattamasyna uqsas bolǵan. Al, Azamat, Azat, Raýan jáne Danıl esimdi balalar oınap júrip, úıinen alystaǵanyn ańǵarmaǵanyn aıtqan», - dep habarlady qolbasshylyqtyń baspasóz qyzmetinen.
Ulttyq ulannyń sarbazdary Jedel basqarý ortalyǵy arqyly balalardy ata-analarymen tabystyrǵan. Qoǵamdyq tártipti saqtaý jónindegi áskerı mindetin oryndaý kezinde qyraǵylyq tanytqan sarbazdarǵa №5546 áskerı bólim komandıriniń alǵysy jarııalandy.
