Atyraýda joǵalǵan 8 jasar qyz mektepte oqymaǵan
ATYRAÝ. QazAqparat – Atyraý qalasynda 6 kúnde 4 jasóspirim joǵalǵan. Onyń ishinde osy kezge deıin mektepte oqymaǵan 8 jasar qyz bar, dep habarlaıdy QazAqparat.
Oblystyq Polıtsııa departamenti baspasóz qyzmetiniń aqparatyna qaraǵanda, 12-18 sáýir aralyǵynda polıtsııada jasóspirimderdiń úıinen shyǵyp, habar-osharsyz ketýine baılanysty 4 derek tirkelgen.
«Máselen, 18 sáýirde Atyraý qalalyq polıtsııa basqarmasynyń «102» operatoryna 36 jastaǵy azamatsha Ashhabad kóshesinde ornalasqan turǵylyqty mekenjaıynan 8 jasar qyzynyń kúndizgi saǵat 13:30 shamasynda shyǵyp ketip, úıine oralmaǵany jóninde habar bergen. Osyǵan baılanysty polıtsııa qyzmetkerleri izdestirý jumysyn júrgizip, joǵalǵan qyzdy túngi saǵat 01:00 shamasynda qaladaǵy kóshelerdiń birinen tapty. Anasyna aıtpaı, kóshege shyǵyp ketken jasóspirimniń mektepte bilim almaıtyny belgili boldy. Sol sebepten, 8 jastaǵy jasóspirim Atyraý oblystyq kámeletke tolmaǵandardy beıimdeý ortalyǵyna ornalastyryldy», - dep habarlady departamenttiń baspasóz qyzmetinen.
Osy kezge deıin bilim almaǵan jasóspirimniń ata-anasyna qatysty is-qujattardy Atyraý qalalyq ákimdigi janyndaǵy kámeletke tolmaǵandardyń quqyǵyn qorǵaý komıssııasyna joldaý kózdelip otyr.
Eske sala ketelik, budan buryn Atyraý oblysynda 1500 ata-ana túngi ýaqytta balalary qaraýsyz júrgeni úshin jazalanǵan bolatyn.
