Atyraýda joǵalǵan 16 jastaǵy qyz týraly jańa málimetter belgili boldy

ATYRAÝ. QazAqparat – Atyraýda bes kún buryn joǵalǵan 16 jastaǵy qyzdy izdeý jalǵasyp jatyr, dep habarlaıdy QazAqparat tilshisi.

Atyraý oblystyq Tótenshe jaǵdaılar departamentiniń qoǵammen baılanys tobynan málim etkendeı, jasóspirim 6 sáýirde úıinen shyǵyp ketken. Sodan beri úıine oralǵan joq.

Qutqarýshylar 7 sáýirden beri joǵalǵan qyzdy Jaıyq ózeninen izdep jatyr. Ony izdestirýge polıtseıler, volonterler men jergilikti turǵyndar qosylǵan.

Jergilikti qoǵam belsendisi Sandýǵash Kýkenova áleýmettik jelidegi paraqshasynda kámeletke tolmaǵan qyz kópirden sekirgeni týraly aqparat taratty.

«Sońǵy beınebaqylaý kamerasynan Ásemaıdyń tek kópirge kóterilip bara jatqany kórindi. Sol jaǵadaǵy bir turǵyn úıdiń kamerasyn qaraý úmitimiz boldy. Alaıda úı ıesi 3 kún úıinde bolmaǵan edi. Úı ıesi ańshylyqqa ketken eken. Keıin onyń kelgenin bildik. Ásemaıdyń ákesi sol úıdiń kamerasyn qarap shyqty. Ókinishke oraı kameradan Ásemaı qyzymyzdyń kópirden sekirip ketkeni kóringen», - deıdi Sandýǵash Kýkenova.

Al oblystyq Polıtsııa departamentiniń baspasóz qyzmetinen málim etkendeı, 16 jastaǵy jasóspirimdi izdeý jalǵasyp jatyr.

«Joǵalǵan qyz izdestirilip jatyr. Adamdar kópirden sekirip ketkenin kórip, ólgenin aıtyp jatyr. Biraq, onyń múrdesi áli tabylǵan joq», - dep habarlady departamenttiń baspasóz qyzmetinen.

Atyraýda 16 jastaǵy qyz tórt kúnnen beri tabylmaı jatqanyn buǵan deıin habarlaǵan bolatynbyz.