Atyraýda jerlesin óltirgen ózbekstandyq 10 jylǵa sottaldy
ATYRAÝ. QazAqparat – Atyraýda jerlesin óltirgen Ózbekstan azamaty 10 jylǵa sottaldy, dep habarlaıdy QazAqparat tilshisi oblystyq sottyń baspasóz qyzmetine silteme jasap.
Atyraý oblysynyń qylmystyq ister jónindegi mamandandyrylǵan aýdanaralyq sotynda QR Qylmystyq kodeksiniń 99-babynyń 1-bóligimen aıyptalǵan Ózbekstan azamatyna qatysty qylmystyq is qaraldy.
Basty sot talqylaýynda anyqtalǵandaı, oqıǵa 2019 jylǵy 12 tamyzda Atyraý qalasyna qarasty Jańatalap yqsham aýdanynda bolǵan.
Ózbekstan Respýblıkasynyń azamattary sottalǵan S., jábirlenýshi H. turǵyn úıde qurylys jumysyn júrgizgen. Sol kúni keshki S. ashana pyshaǵyn shalbarynyń qaltasyna salyp, aýlaǵa shyqqan. Ózine jumys taýyp bergen jerlesine budan bylaı istemeıtinin, ketetinin aıtyp, jumysy úshin tólenýge tıisti sońǵy 10 myń teńgesin berýdi suraıdy.
Jerlesi oǵan bastaǵan jumysty aıaqtaý kerektigin eskertip, aqshasyn bermeıtinin aıtqan.
«Osy kezde ekeýiniń arasynda janjal shyǵyp, S. qaltasynan pyshaq shyǵaryp H.-nyń keýdesine suqqan jáne sol qolyn qatty jaraqattaǵan», - delingen habarlamada.
Jábirlenýshi aýyr jaraqattan esin jımastan qaıtys bolǵan.
Sot úkimimen S. adam óltirgeni úshin kináli dep tanylyp, oǵan 10 jyl merzimge bas bostandyǵynan aıyrý jazasy taǵaıyndaldy.
