Atyraýda jerasty sýlaryn tazartý jáne tuşylandyrý jobalary qolǵa alynbaq
ASTANA. 27 qyrkúıek. QazAqparat - Atyraý oblysynda «Jasyl ekonomıka» baǵdarlamasy aıasynda jerasty sýlaryn tazartý jáne tuşylandyrý jobalary qolǵa alynady.
Bul týraly búgin Astanada QR Prezıdenti janyndaǵy Ortalyq kommýnıkatsııalar qyzmetinde ótken baspasóz máslıhatynda Atyraý oblysynyń ákimi Baqtyqoja Іzmuhambetov málim etti.
«Memleket basshysy «Jasyl ekonomıka» jobasyn damytýdy tapsyrdy. Osy maqsatta oblysta qýattylyǵy 50 megavatt bolatyn jel elektr stansasyn salý úshin áleýetti ınvestorlardy tartý jumystary júrgizilýde», - dep atap ótti ol.
Sonymen qatar jerasty sýlaryn paıdalaný maqsatynda Balı jáne Jańasý jerasty sýlaryn tazartý jáne tuşylandyrý jobalary qarastyrylýda.
«Atyraýda aýyzsý qashannan eń ózekti másele bolyp keldi jáne qala bermek. Jerasty sý kózderin ıgerý atalmysh problemany sheshýge birshama kómektesedi», - dedi B.Іzmuhambetov.
