Atyraýda jer qoınaýyn ruqsatsyz paıdalanǵan kásiporyndarmen kelisimshart buzyldy
Atyraý oblystyq mamandandyrylǵan tabıǵat qorǵaý prokýrory Erkebulan Ermektovtiń málimetinshe, keń taralǵan paıdaly qazbalardy óndirý úshin karerlerdi ruqsatsyz paıdalanǵan kásiporyndar anyqtalǵan.
«Prokýratýra qyzmetkerleri jer qoınaýyn paıdalanýshylardyń jumysyna taldaý júrgizdi. Taldaý qorytyndysymen kásiporyndardyń tarapynan birneshe talaptyń oryndalmaǵany anyqtaldy. Onyń ishinde lıtsenzııalyq mindettemelerdiń oryndalmaǵany, mindetti tólemderdiń túspegeni, jer paıdalaný quqyqtarynyń úshinshi tulǵalarǵa zańsyz berilgeni jáne jer ýchaskelerin quqyq belgileıtin qujatsyz paıdalanylǵany týraly zań buzýshylyqtar bar. Prokýrorlyq qadaǵalaý aktisine sáıkes jalpy kólemi 773,9 ga jer ýchaskesiniń qoınaýyn ıgerýge jasalǵan «Atyraý» áleýmettik kásipkerlik korporatsııasy» AQ-nyń 13 kelisim sharty jáne «Konsaltıng-Nedra» JShS-niń 1 kelisim sharty buzyldy», - dep habarlady Erkebulan Ermekov.
Onyń aıtýynsha, Atyraý oblystyq tabıǵı resýrstar jáne tabıǵatty paıdalanýdy retteý basqarmasy basshysynyń orynbasary «sógis» túrindegi tártiptik jaýaptylyqqa tartylǵan.
«Mundaı taldaý jumystary áli jalǵasyp jatyr. Zańdylyqty buzǵan basqa da jer qoınaýyn paıdalanýshylarǵa qatysty sharalar qabyldanady», - dep málim etti Erkebulan Ermekov.
Eske sala ketelik, buǵan deıin Atyraý oblysynda 206 myń gektar jer memleket menshigine qaıtarylǵanyn habarlaǵan bolatynbyz. Atyraý oblystyq jer qatynastary basqarmasynyń basshysy Álibek Ermekqalıdiń málimetinshe, byltyrǵy on bir aıda 206 gektar, onyń ishinde aýyl sharýashylyǵy maqsatyndaǵy 185 jer ýchaskesi memleketke qaıtarylǵan.
