Atyraýda jeńil kólik qaqqan jaıaý júrginshi mert boldy
Atyraý oblystyq polıtsııa departamentiniń baspasóz qyzmetinen málim etkendeı, jol-kólik oqıǵasy 20 jeltoqsanda saǵat 21:00 shamasynda bolǵan.
«Atyraý qalasynyń «Juldyz» móltek aýdanynda ornalasqan «Botaqanym» sýpermarketi tusynda bolǵany anyqtaldy. «VAZ – 21101» avtokóliginiń rýlinde 24 jastaǵy júrgizýshi bolǵan. Júrgizýshi rettelmegen jaıaý júrginshiler jolaǵynan ótip bara jatqan 1993 jylǵy jaıaý jolaýshyny qaǵyp ketken. Jol-kólik oqıǵasynyń saldarynan jaıaý júrginshi oqıǵa ornynan qaza tapty», -dep habarlady departamenttiń baspasóz qyzmetinen.
Qazir atalǵan derekke qatysty Atyraý oblystyq polıtsııa departamentiniń qyzmetkerleri QR Qylmystyq kodeksiniń 345-babynyń 3-bóligimen sotqa deıingi tergep-tekserý bastady.
Eske sala ketelik, budan buryn Atyraýda jaıaý júrginshini mert qylǵan mas júrgizýshi ustalǵanyn habarlaǵan bolatynbyz.
Atyraý qalasynda Mercedes Benz kóliginiń júrgizýshisi mas kúıde rýlge otyryp, er adamdy qaǵyp ketken. Alaıda, bul týraly ishki ister organyna habarlamaı, oqıǵa ornynan qashyp ketken. Kólik qaqqan er adam oqıǵa ornynda qaıtys bolǵan.
Polıtsııa qyzmetkerleri qalanyń Stahanov kóshesinde ornalasqan garajdardyń arasynan Mercedes Benz kóligin tapty. Kólikti mas kúıinde júrgizgen 1988 jylǵy júrgizýshi ustaldy. Qazir kúdikti qamaýda otyr.
Jol-kólik oqıǵasyna baılanysty QR Qylmystyq kodeksiniń 345-babynyń 3-bóligimen jáne 347-babymen tergeý amaldary júrip jatyr.