Atyraýda jeńil kólik qaqqan mototsıkl júrgizýshisi aýrýhanada kóz jumdy
Oqıǵa Atyraý qalasynda 14 shildede jergilikti ýaqytpen saǵat 20:50 shamasynda bolǵan. Bul derekti oblystyq polıtsııa departamentiniń baspasóz qyzmeti rastady.
Munaıly shahardyń «Avangard» shaǵyn aýdanyndaǵy L.Vladımırskıı kóshesinde «Toyota Camry» kóligi solǵa burylys manevryn jasaý kezinde qarama-qarsy kele jatqan «Honda» mototsıkline jol bermegen.
Sonyń saldarynan jeńil kólik pen mototsıkl soqtyǵysqan.
Soqqynyń ekpinimen mototsıkl qarsy baǵyttaǵy jolaqta kele jatqan «VAZ-2114» kóligimen túıisken.
Jol-kólik oqıǵasynyń saldarynan mototsıkl rýlinde bolǵan 1989 jylǵy júrgizýshi ártúrli dene jaraqatyn alǵan.
Zardap shekken jigit jedel járdem brıgadasynyń kóligimen oblystyq aýrýhanaǵa jetkizilgen.
«Aýrýhananyń jansaqtaý bólimine túsken 33 jastaǵy jigit kóz jumdy. Qazir polıtsııa qyzmetkerleri jol-kólik oqıǵasyna baılanysty tergeý júrgizilýdi bastady», -dep habarlady departamenttiń baspasóz qyzmeti.
Jergilikti polıtsııa qyzmeti basqarmasynyń bastyǵy, polıtsııa polkovnıgi Erlan Bıǵambaevtyń málimetine súıensek, jol-kólik oqıǵasyna uryndyratyn birneshe sebep bar.
Birinshiden, muny qarsy baǵyttaǵy jolaqqa shyǵýmen baılanystyrýǵa bolady.
Ekinshiden – jaıaý júrginshilerdi qaǵý, úshinshiden – jol qıylystarynan ótý erejesin buzý, tórtinshiden – jyldamdyqty shamadan tys asyrý. Besinshiden – mas kúıde rýlge otyrý.
«Atyraý oblysynyń aýmaǵynda 6 aıda osyndaı sebepterden jol-kólik oqıǵasy – 21,4, qaza bolǵandar – 60, dene jaraqatyn alǵandar sany 11,8 paıyzǵa ósip otyr. Osy kezeńde jol-kólik oqıǵasynan 40 adam qaza taýyp, 189 adam ártúrli dene jaraqatyn aldy. Jyl basynan beri jyldamdyqty shamadan tys asyrǵan 153 myńnan, qarsy baǵytqa shyqqan 130-dan, jaıaý júrginshilerge jol bermegen 800-den, jaıaý júrginshilerge arnalǵan jolaqtan ótý kezinde 5 myńnan astam quqyq buzýshylyq deregi anyqtaldy», -dep málim etti Erlan Bıǵambaev.
Eske sala ketelik, budan buryn Atyraý oblysynda alty aıda jol apatynan 40 adam mert bolǵanyn habarlaǵan edik.
