Atyraýda jeńil kólik avtobýspen soǵylyp, júrgizýshi kóz jumdy
Jol-kólik oqıǵasy búgin, 20 qazanda jergilikti ýaqytpen saǵat 13:00 shamasynda tirkelgen.
«Atyraý qalasyna taıaý ornalasqan Erkinqala-2 eldi mekenindegi №40 pen 5-kóshe qıylysynda Skoda markaly avtokóliginiń júrgizýshisi qoǵamdyq kólikke jol bermegen. Sóıtip, jolaýshy tasymaldap kele jatqan Yutong markaly qoǵamdyq avtokólikpen soqtyǵysqan. Soqqynyń ekpinimen avtobýs kóshe jıeginde ornalasqan jeke turǵyn úıdiń qorshaýyna soǵyldy. Jol-kólik oqıǵasynyń saldarynan Skoda markaly avtokólikti basqarǵan 1966 jylǵy júrgizýshisi oqıǵa ornynda qaza tapty», -dep habarlady departamenttiń baspasóz qyzmetinen.
Qazir polıtsııa departamentine qarasty qurylym qyzmetkerleri jol-kólik apatyna baılanysty tıisti is-qujattardy jınaqtap jatyr.
Eske sala ketelik, budan buryn Atyraý oblysynda kólik qaqqan 11 jasar jasóspirim kóz jumǵanyn jazǵan bolatynbyz.
Bul jol-kólik oqıǵasy da búgin, 20 qazanda tańerteń bolǵan.
«Jylyoı aýdanynyń ortalyǵy – Qulsary qalasynda Toyota Prado kóligi jasóspirimdi qaǵyp ketti. Jasóspirim oqıǵa ornynda kóz jumdy. Kólikti 1949 jylǵy týǵan er adam basqarǵany anyqtaldy», - dep málim etti departamenttiń baspasóz qyzmetinen.