Atyraýda jemqorlyq qylmysy 41 paıyzǵa azaıǵan
Oblys ákimi Mahambet Dosmuhambetov ótkizgen komıssııa otyrysynda «Laýazymdyq ókilettikterdi teris paıdalaný» jáne «Para berý» sekildi sybaılas jemqorlyq qylmystarynyń ósý máselesi men monıtorıng nátıjeleri qaraldy. Sybaılas jemqorlyqqa qarsy is-qımyl agenttigi Atyraý oblysy boıynsha departamentiniń basshysy Qanat Súleımenov óńirdegi jemqorlyq qylmysyna toqtaldy.
«Byltyr oblysta jemqorlyq deńgeıi 12%-ǵa, bıylǵy І toqsanda 41%-ǵa tómendedi»,-dedi Qanat Súleımenov.
Onyń aıtýynsha, quqyqtyq statıstıkada paraqorlyq jáne laýazymdyq ókilettigin teris paıdalaný derekteri ósken. Ásirese, ishki ister organynda para alý deregi jıi kezdesken. Ótken jyly osyndaı 8 qylmys anyqtalǵan. Mahambet aýdanynda jemqorlyqqa qatysty 6, Jylyoı aýdanynyń bilim salasynda 3 derek tirkelgen. Sondaı-aq, memlekettik satyp alýda taýarlar men qyzmetter baǵasyn negizsiz ósirý baıqalǵan.
«Ótken jyly memlekettik satyp alýda baǵalardy asyra ósirý deregimen 31 buzýshylyq anyqtaldy. Osyǵan oraı berilgen usynystar negizinde bıýdjettiń 364 mln teńgesi únemdeldi. Monıtorıng júrgizý kezinde zań buzýshylyqtar densaýlyq saqtaý, bilim berý salalarynda jıi oryn alatynyn baıqaldy», - dedi Sybaılas jemqorlyqqa qarsy is-qımyl agenttiginiń Atyraý oblysy boıynsha departamenti basshysynyń birinshi orynbasary Aıdos Mamyt.
Al, «Atyraý – adaldyq alańy» jobalyq keńsesiniń jetekshisi Álfııa Ádıevanyń aıtýynsha, bıyl 32 turǵynnan resmı túrde, al resmı emes turǵyda 52 aryz shaǵym kelip túsken. Máselen, bilim berý salasyna 13 shaǵym, densaýlyq saqtaýǵa – 19, azyq-túlik baǵasynyń turaqsyzdyǵyna – 18, dári-dármek baǵasynyń ósimine qatysty 20 shaǵym berilgen.
«Oblystyq densaýlyq saqtaý basqarmasynyń basshysymen, Atyraý qalasy men aýdandardaǵy emhana, aýrýhanalardyń bas dárigerlerimen kezdesý ótkizildi. Qazir oblystyq basqarma basshysynyń qoldaýymen tegin beriletin dári-dármekterdiń ashyqtyǵyn qamtamasyz etý maqsatynda birlesken jumys júrgizilýde», - dedi Álfııa Ádıeva.
Oblys ákimi tıisti sala basshylaryna sybaılas jemqorlyqqa negiz bolatyn keleńsizdikterdiń aldyn alýdy tapsyrdy.
«Sybaılas jemqorlyqpen kúres – Memleket basshysy Qasym-Jomart Toqaevtyń Joldaýyndaǵy basty maqsattardyń biri. Osyǵan oraı, sybaılas jemqorlyqpen kúresýdi úzdiksiz júrgizý, onyń jolyn kesý, aldyn alý joldaryn kúsheıtý, ádis-tásilderin árdaıym jetildirip otyrý qajet dep sanaımyn. Jemqorlyqqa qarsy kúreste barlyq tulǵalar zań men sot aldynda teń bolýyn eskerý qajet», - dedi oblys ákimi Mahambet Dosmuhambetov.
Eske sala ketelik, budan buryn Atyraý oblysynda jemqorlyq týraly habarlaǵandarǵa 2,6 mln teńge berilgenin jazǵan edik.