Atyraýda jekpe-jek festıvaline 2,5 myń kórermen jınaldy
ASTANA. QazAqparat - 19 tamyz kúni Atyraýda Atyrau Sport Fest 2017 degen atpen sport kúnine arnalǵan aýqymdy jekpe-jek festıvali ótti. Kórermender tartystyń 16 túrin tamashalap, Atyraý oblysynyń sportshylary 16 eldiń jekpe-jek sheberlerine qarsy turdy, dep habarlaıdy Atyraý oblystyq kommýnıkatsııalar qyzmeti.
Festıvaldiń hedlaıneri retinde reseılik tanymal Estradarada toby óner kórsetip, keshtiń qurmetti qonaǵy UFC týy astynda óner kórsetip júrgen jáne áli jeńilip kórmegen jekpe-jek sheberi Habıb Nýrmagomedov boldy.
- Festıvaldiń basty maqsaty - adamdardyń sportqa degen qyzyǵýshylyǵyn oıatý. Mundaı kólemdegi jáne formattaǵy is-shara Qazaqstanda birinshi ret ótkizilip tur. Jergilikti sharalardy iske asyrýda qoldaýǵa daıyn turatyn kásipkerlerdiń de bar ekendigi qýantady. Úlken kómekti oblystyq jekpe-jek óneri federatsııalary kórsetti ,olardyń árqaısysy shet elderden qarsylastardy shaqyrýǵa qarajat bóldi, al bul - shyǵynnyń negizgi bóligi. Hedlaınerler men juldyzdy qonaqtardy demeýshilik kórsetken adamdardyń arqasynda shaqyrdyq. Olardyń kómektesýge daıyn ekendigi men kórermen zalynyń lyq tolýy bolashaqta Atyraý Qazaqstandaǵy sport astanasy bola alatyndyǵyn kórsetedi, biz oǵan bar kúshimizdi salamyz, - dedi dene shynyqtyrý jáne sport bóliminiń basshysy Azamat Beket.
Jalpy alǵanda, Atyraý oblysynyń sportshylaryna qoldaý kórsetýge 2,5 myńnan asa adam keldi. Kórermenderdiń jartysy festıvaldi muz saraıynda tamashalady, al ózge turǵyndar jekpe-jekti kóshede LED ekrannan kórýge múmkindik aldy.
Atyraý oblysynyń sportshylary jankúıerlerdiń úmitin aqtap, barlyq 16 urysta da jeńimpaz atandy. Keshtiń fınaldyq jekpe-jeginde Atyraýlyq kúresker Isataı Temirov brazılııalyq Fortýnat Lapty qýatty apperkotpen nokaýtqa túsirip, kórermenderdi tań-tamasha qyldy.
Іs-sharada Atyraý oblysynyń sportshylary jaqyn jáne alys shetelden kelgen sportshylarmen jekpe-jektiń 16 túri -MMA, dzıýdo, sambo, kúres sambosy, taekvando, jekpe-jek, karate VKF, boks, kıkboksıng, Taı boksy, pankratıon, grek-rım kúresi, djıý djıtsý, kıokýshınkaı karate, erejesiz jekpe-jek boıynsha kúreske shyqty. Munaı astanasyna Ýkraına, Reseı, Grýzııa, Ázerbaıjan, Brazılııa, Koreıa, Túrkııa, Ispanııa, Taıland, Polsha, Belgııa, Iran, Marokko jáne basqa da 16 elden sportshylar qatysty.
