Atyraýda jedel járdem qyzmetiniń jańa beketi óz jumysyn bastady
ATYRAÝ. QazAqparat - Atyraýda qala kúnine oraı jańa medıtsınalyq nysannyń ashylý saltanaty ótti, dep habarlaıdy QazAqparat tilshisi qalalyq ákimdiktiń baspasóz qyzmetine silteme jasap.
«Nursaıa» yqshamaýdanynda jedel-járdem qyzmetiniń jańa nysany ashyldy. Saltanatty shara ár jyly qazan aıynyń alǵashqy senbisinde toılanatyn qala kúnine oraı ótkizildi. Ashylý saltanatyna qala ákiminiń orynbasary Polymbet Hasanov pen Atyraý oblystyq densaýlyq saqtaý basqarmasynyń basshysy Mánshúk Aımurzıeva qatysty.
Oblystyq densaýlyq saqtaý basqarmasy basshysynyń aıtýynsha, jańa nysan jaqyn mańdaǵy úıler men yqshamaýdandardan 75 myń turǵyndy qabyldaı alady. Shaqyrtýlarǵa 8 jedel járdem brıgadasy shyǵady. Jańa jedel járdem beketiniń shtat quramy 50 adamnan turady. Munda 32 feldsher, 18 dıspetcher, júrgizýshiler men orta býyndaǵy medıtsına qyzmetkerleri jumys isteıdi. Jańa nysan zamanaýı qurylǵylarmen jabdyqtalǵan, barlyq reanımobılderde GPS-navıgatorlar ornatylǵan.
Sondaı-aq, bul jerde alǵashqy kómek kórsetýden praktıkalyq trenıngter ótkizetin oqý-jattyǵý bólmesi bar.
«Jaqyn arada «Nursaıa» yqshamaýdanynda memlekettik-jekemenshik áriptestik aıasynda 12 myń turǵynǵa qyzmet kórsete alatyn jańa emhana salynady. Atyraý oblysy ákiminiń tapsyrmasymen jergilikti bıýdjet jáne memlekettik-jekemenshik áriptestik esebinen jýyq arada Atyraýda taǵy bir beket, sonymen qatar 3 qosalqy jedel járdem beketi ashylady»,- deıdi Mánshúk Aımurzıeva.
Aıta ketelik, 1-7 qazan aralyǵynda Atyraýda qala kúnine oraı birqatar mádenı jáne sporttyq sharalar ótkizý josparlanǵan.
