Atyraýda jedel járdem kóliginiń naýqasqa jetý ýaqyty qysqartylmaq
ASTANA. QazAqparat - Atyraýda barlyq «103» qyzmettik avtokólikteri kópshilik birden baıqaýy úshin ashyq sary túske boıalady, dep habarlaıdy QazAqparat Óńirlik kommýnıkatsııalar qyzmetine siltememen.
Oblystyq densaýlyq saqtaý basqarmasynyń málimdeýinshe, búgingi kúnge deıin 6 avtokólik - «Ford Tranzıt» jáne 4 «Hıýndaı» markaly avtokólik boıaldy.
«Aldaǵy ýaqytta kezek boıynsha qalǵan sanıtarlyq avtokólikter boıalady. Ashyq tústegi arnaıy kólikter kóp kólikter arasynda kózge erekshe kórinedi, sondaı-aq aq tústegi avtokólik mashınalardyń arasynda baıqalmaı kalady», - deıdi qalalyq jedel járdem stantsııasynyń bas dárigeri Gýlnafıs Tańbaeva.
Aıta keteıik, kólikter 28 sáýir kúni, ıaǵnı «Jedel járdem» kúni boıaldy. Odan keıin kólikteri Atyraý kóshelerimen júrip ótti.
Qazirgi tańda oblystyq densaýlyq saqtaý basqarmasy enshisinde 92 jedel járdem kóligi bar. Atyraý oblysyndaǵy brıgadalar jumysyn jedeldetý úshin 2017 jyldyń sońynda dıspetcherlik qyzmetti avtomattandyrý programmalyq kesheni boıynsha jańartý jumystary júrgizildi. Bul - aımaqtaǵy JJS, aýrýhananyń aqparattyq júıesi jáne AMK qyzmetterindegi biryńǵaı avtomattandyrylǵan qońyraýdy basqarý júıesi. Endigi jospar - Medıtsınalyq kómek kórsetý boıynsha qońyraýlardy basqarý jáne baqylaý jónindegi úılestirý ortalyǵymen yqpaldastyq ornatý.
«Búgingi kúni Atyraý qalasynyń barlyq brıgadalary planshettermen jabdyqtalǵan, bul qońyraýlardy ratsııa nemese telefondy qoldanbaı-aq brıgadaǵa jetkizýge múmkindik beredi», - deıdi Gúlnafıs Tańbaeva.
Oblystaǵy jazataıym oqıǵalardy azaıtý maqsatynda jyl basynan beri alǵashqy medıtsınalyq kómek kórsetý boıynsha 50 erikti, onyń ishinde muǵalimder men JPP qyzmetkerleri oqytyldy. 2017 jyly 37 erikti alǵashqy medıtsınalyq kómek kórsetý boıynsha oqytýdan ótti.
2018 jyldyń qańtar aıynan bastap 1 jedel járdemde bosaný faktisi tirkeldi, dárigerler bes adamnyń ómirin saqtap qaldy. Salystyrmaly túrde, ótken jyly 8 jedel járdemde bosaný faktisi tirkelip, 35 adam qutqarylǵan bolatyn.
