Atyraýda jedel járdem kóligi jol apatyna ushyrady
Oblystyq polıtsııa departamentiniń baspasóz qyzmetinen málim etkendeı, jol-kólik oqıǵasy 11 qyrkúıekte saǵat 17:30 shamasynda bolǵan.
«Atyraý qalasyndaǵy «Balaýsa» shaǵyn aýdanynda jedel-járdem brıgadasynyń kóligi ekinshi deńgeıli jolaqtan shyǵyp, basty jolmen kele jatqan «Toyota Land Cruiser» kóligine jol bermegen. Sonyń saldarynan eki kólik soqtyǵysyp qalǵan. Soqqynyń ekpinimen jedel járdem kóligi jeke turǵyn úıdiń qorshaýyna soǵylǵan», -dep habarlady polıtsııa departamentiniń baspasóz qyzmetinen.
Jol-kólik oqıǵasynyń saldarynan jedel járdem kóliginde bolǵan eki jolaýshy jáne «Toyota Land Cruiser» kóliginiń júrgizýshisi aýrýhanaǵa jetkizildi.
Qazir polıtsııa qyzmetkerleri jol-kólik oqıǵasyna baılanysty tıisti is-qujattardy jınaqtap jatyr.
Patrýldik polıtsııa batalonynyń komandıri Dáýren Násıpollanyń aıtýynsha, jyl basynan beri tek Atyraý qalasynyń aýmaǵynda 93 jol-kólik oqıǵasy tirkelgen. Jol apatynan 95 adam ártúrli dene jaraqatyn alsa, 7 adam qaza tapqan.
Eske sala ketelik, buǵan deıin Atyraý oblysynda kólik aýdarylyp, eki adam mert bolǵanyn jazǵan edik.
