Atyraýda jedel járdem brıgadasy ózekke qulaǵan balany aman alyp qaldy
ATYRAÝ. QazAqparat – Atyraý oblysynda jedel járdem brıgadasy ózekke qulaǵan balany aman alyp qaldy, dep habarlaıdy QazAqparat.
Oqys oqıǵa Jylyoı aýdanynda bolǵan. Qursaı ózeginiń jaǵalaýynda oınap júrgen kishkentaı bala sýǵa qulap ketken. Ákesi balany sýdan shyǵarǵan. Biraq, bala esinen tanyp qalǵan.
«Balanyń ájesinen jedel járdemge shaqyrtý tústi. Oqıǵa ornyna 3 mınýtta jettik. Sýdy kóp jutqandyqtan, balanyń tynys alý joldary bitelip qalǵan eken. Sol sebepten, bala esinen tanyp, beti kógerip ketken. Onyń ústine sýdyń salqyndyǵynan qatty tońǵan. Biz taǵy bir mınýtqa keshikkende, onyń ómirin saqtaı almas edik», - deıdi Jylyoı aýdandyq jedel járdem stantsııasynyń feldsheri Botagóz Baǵytjanova.
Dárigerler sol jerde jan saqtaý bóliminde istelýi tıis medıtsınalyq kómekti kórsetken. Aldymen, balanyń ókpesin sýdan tazartyp, júregine massaj jasaǵan. Ottegi berip, jyly jamylǵyǵa orap, aýdandyq ortalyq aýrýhanaǵa jetkizgen. Sol jerde esin jıǵan balany dárigerler jiti tekserýden ótkizgen. Ómirine tóner qaýip joǵyna kóz jetkizgen dárigerler balany úıine jibergen.
