Atyraýda Jaıyqtyń ústinen ótetin kópir jeltoqsanda paıdalanýǵa beriledi
«Elbasy oblysymyzǵa sapar barysynda árdaıym óńir halqyn tolǵandyratyn, ınfraqurylymdy damytý jóninde turǵyndardyń suranysy joǵary máselelerine kóńil bólip otyrady. Prezıdent bıyl 23 tamyz kúni Atyraý oblysyna resmı sapary kezinde osy máselemen tanysqan bolatyn. Osylaısha, «Atyraý-Astrahan» tas jolyn 2018-2020 jyldary aıaqtaý týraly tapsyrma bergen edi. Onyń syrtynda Mahambet eldi mekeniniń qasyndaǵy - eki jaqtaǵy 30-40 myń adamnyń emin-erkin aralasýyna, bıznesiniń damýyna, sol jerdegi aýyl sharýashylyǵy kásipkerleriniń isin dóńgeletýge jaǵdaı jasaıtyn, Jaıyq ózeniniń ústinen ótetin kópirge qajetti qarajatty bólý týrasynda tapsyrma bergen bolatyn», - dedi Atyraý oblysynyń ákimi Nurlan Noǵaev OKQ-da ótken baspasóz máslıhatynda.
Oblys basshysynyń aıtýyna qaraǵanda, Úkimet kópir salý týrasynda usynysty tolyq qoldaǵan.
«Osy jeltoqsan aıynda Jaıyq ózeniniń ústinen ótetin aspaly kópirdi iske qosýdy josparlap otyrmyz», - dedi Nurlan Noǵaev.
Eske sala ketsek, atalmysh baspasóz máslıhatynda Nurlan Noǵaev óńirdegi balyq sharýashylyǵynyń tabysyn da atap ótken bolatyn. Onyń aıtýynsha, atyraýlyq balyq óńdeýshi kásiporyndar 500 keli qara ýyldyryq saýdalaý múmkindigine qol jetkizip otyr.
Sondaı-aq, Nurlan Noǵaev Atyraý oblysynda jyl sońyna deıin 30 áleýmettik nysan iske qosylatynyn habarlaǵan edi.
