Atyraýda Jaıyqtan zańsyz balyq aýlaǵandar sottaldy
ATYRAÝ. QazAqparat - Atyraýda Jaıyq ózenine aý quryp, zańsyz balyq aýlaǵandar sottaldy, dep habarlaıdy QazAqparat tilshisi.
Atyraý qalasynyń №2 sotynda Qazaqstan Respýblıkasynyń QK-niń 335-babynyń 3-bóliginiń 4-tarmaǵynda kózdelgen qylmystyq quqyq buzýshylyqty jasaǵandary úshin aıyptalǵan B. men O.-ǵa qatysty qylmystyq is qaraldy.
«Sottalýshylar B. men O. balyqtardy zańsyz aýlaý maqsatynda ekeýi aldyn ala sóz baılasyp, Atyraý qalasy, Talǵaıran poselkesi tusynda qaıyqpen shyqqan. Jaıyq ózenine aý quryp, 175 kg aqqaıran balyǵyn ustaǵan. Keıin olardy jaǵaǵa shyǵaryp, qapqa salyp jatqan jerinen polıtsııa qyzmetkerlerine ustalǵan. Sot otyrysynda sottalýshylar óz kinálárin tolyqtaı moıyndap, jasaǵan áreketterine ókinish bildiretinderin aıtty. Mámile túrindegi kináni moıyndaý týraly protsestik kelisim jasaqtaýǵa nıet bildirdi» dep habarlady Atyraý qalasynyń №2 sotynyń baspasóz qyzmetinen.
Aıta ketelik, sot úkimimen B. jáne O. kináli dep tanylyp, olarǵa balyq aýlaý qyzmetimen aınalysý quqyǵynan 2 jyl merzimge aıyra otyryp, 1 jyl merzimge bas bostandyǵynan shekteý jazasy taǵaıyndaldy.
