Atyraýda Jaıyqtan aýlanǵan qortpadan 20 keliden astam qara ýyldyryq alyndy

ATYRAÝ. QazAqparat – Atyraýda Jaıyq ózeninen aýlanǵan qortpadan 20 keliden astam qara ýyldyryq alyndy, dep habarlaıdy QazAqparat.

Buǵan deıin «Amangeldi» óndiristik kooperatıviniń balyqshylary Jaıyqtan 150 keli tartatyn qortpa balyǵyn aýlaǵan edi. Jaqynda «Jaıyq-Atyraý» bekire şabaǵyn ósirý zaýytynyń mamandary qortpadan jasandy jolmen 20,3 keli ýyldyryq aldy.

«Qara ýyldyryq ınkýbatsııalaý úshin apparattarǵa salyndy. Sodan keıin basseınderde, odan ári sý toǵandarynda ósiriledi. Sóıtip, ortasha salmaǵy 3-5 gramm bolatyn 600 myń dana qortpa shabaǵyn alý josparlanyp otyr. Shabaqtar jetilgen soń shilde-tamyz aılarynda tabıǵı ortaǵa, ıaǵnı Kaspıı teńizine jiberiledi» -deıdi zaýyt dırektory Ǵılman Sársemalıev.

Onyń aıtýynsha, bıyl bekire tuqymdas baǵaly balyqtar shabaǵynyń 7 mln danasyn ósirý josparlanǵan.