Atyraýda Jaıyqqa bekire tuqymdas balyqtyń 3,6 mln-nan astam shabaǵy jiberildi
ATYRAÝ. QazAqparat – Atyraý oblysynda Jaıyq ózenine bekire tuqymdas balyqtyń 3,6 mln-nan astam shabaǵy jiberildi, dep habarlaıdy QazAqparat.
Bıyl Atyraý bekire shabaǵyn ósirý zaýytynyń mamandary jasandy toǵandarda shoqyrdyń 3 mln 658 myń shabaǵyn ósirgen. Búgin shoqyr shabaqtaryn sý aıdynyna jiberý Atyraý oblystyq orman sharýashylyǵy jáne janýarlar dúnıesi aýmaqtyq ınspektsııasy janynan qurylǵan arnaıy komıısıa músheleriniń qatysýymen ótti.
Zaýyt dırektory Rashıdın Qalıdýllınniń málimetinshe, bıylǵy kóktemde zaýyt pen óndiristik kooperatıvterdiń balyqshylary baǵaly bekire tuqymdas balyqtar tobyna jatatyn shoqyrdyń 103 danasyn aýlaǵan. Onyń ishinde 42 analyq, 61 analyq balyq bolǵan.
«Bizdiń maqsatymyz –Jaıyq-Kaspıı sý basseınine bekire tuqymdas balyqtar shabaǵyn jiberý. Sol sebepten, shoqyr balyǵynan jasandy jolmen 60 keli qara ýyldyryq alyndy. Osy maqsatta aýlanǵan shoqyrdyń bárin Kaspıı teńizine jiberdik. Al, búgin Jaıyq ózenine jiberilgen shabaqtar da Kaspıı teńizine jetedi. Shabaqtardyń salmaǵy 5-14 gramm aralyǵyn qurady» -dedi Rashıdın Qalıdýllın.
Eske sala ketelik, budan buryn Atyraýda Jaıyq ózenine 2,8 mln bekire shabaǵy jiberilgen edi.
