Atyraýda Jaıyqqa batyp bara jatqan mas er adam qutqaryldy
Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, oqıǵa 21 shildede bolǵan.
«Jedel qutqarý jasaǵynyń qutqarýshylary jergilikti ýaqytpen keshki saǵat21:05-te Jaıyq ózenine batyp bara jatqan er adamdy baıǵan. Qutqarýshylar jedel áreket etip, er adamdy sýdan shyǵardy. Keıin 1979 jylǵy er adamnyń mas kúıde Jaıyq ózenine túskeni anyqtaldy. Ol ózenniń arnaıy jabdyqtalmaǵan tusynan sý túsip, jaǵalaýdan alystap ketken. Biraq, jaǵaǵa qaıta oralýǵa kushi jetpegen», -dep habarlady departamenttiń qoǵammen baılanys toby.
Tótenshelikter oblys turǵyndary men qonaqtaryna osyndaı oqıǵanyń aldyn alý úshin birneshe keńesti usynyp otyr.
«Sý aıdyndarynda shomylý kezindegi arnaıy erejelerdi saqtaý qajet. Birinshiden, sý aıdyndarynyń arnaıy jabdyqtalǵan ornynda shomylǵan jón. Ekinshiden, tyıym salynǵan jerlerge sý túsýge bolmaıdy. Úshinshiden, sýda júrgen motorly kemelerge jaqyndamaı, qashyqta shomylý kerek. Tórtinshiden, alkogoldik ishimdik ishken adamǵa sý aıdyndarynda shomylýǵa tyıym salynady. Al, ata-analar balalarynyń sý aıdyndaryna óderi barýyna jol bermeýge tıis. Ózderimen birge barǵan balalaryn qaraýsyz qaldyrmaǵany jón», -dep málim etti departamenttiń qoǵammen baılanys tobynan.
Eske sala ketelik, budan buryn Atyraý oblysynda bir aıǵa jetpeı 8 adam sýǵa batyp ketkenin jazǵan bolatynbyz.
Atyraý oblysynda jyl basynan beri 10 adam sýǵa batyp ketken. Sýǵa batqandar arasynda 3 bala bar. Shomylý maýsymy bastalǵan 15 maýsymnan beri 8 adam jantásilim etti.
