Atyraýda Jaıyqqa batqan aǵaıyndy jasóspirimderdiń biriniń denesi tabyldy
Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, Jaıyq ózenine batqan aǵaıyndy eki jasóspirimdi izdeý 4 kún qatarynan jalǵasyp jatyr.
«Jedel qutqarý jasaǵynyń qutqarýshylary 13 maýsymda keshki mezgilde ózenge batyp ketken eki jasóspirimdi izdestirýdi bastaǵan edi. Sol kúni bir top jasóspirim Atyraý qalasynyń mańyndaǵy Geolog eldi mekeni tusynda Jaıyq ózenine shomylýǵa barǵan. Jasóspirimder shomylýǵa tyıym salynǵan belgi ornatylǵan tusta sýǵa túsken. Alaıda, 2007 jáne 2008 jylǵy aǵaıyndy jasóspirimder Jaıyq ózenine batyp ketken», -dep habarlady departamenttiń qoǵammen baılanys toby.
Jedel qutqarý jasaǵynyń súńgýir-qutqarýshylary 13 maýsymnan beri jalpy aýdany 400 sharshy metrden astam, 2 metrden 17 metrge deıindi tereńdikte sýasty súńgý jumystaryn júrgizgen. Sonyń nátıjesinde 16 maýsymda jergilikti ýaqytpen saǵat 15:10-da bir jasóspirimniń múrdesi sýdan shyǵarylǵan.
«Jasóspirimniń biriniń múrdesi sýǵa shomylǵan jerden 20 metr radıýsta, 12 metr tereńdikten tabyldy. Onyń 2008 jylǵy jasóspirim ekeni anyqtaldy. Qutqarýshylardyń kómegimen múrdeni sýdan shyǵardy», -dep málim etti departamenttiń qoǵammen baılanys tobynan.
Keshe, 16 maýsymda Jaıyq ózeninde aǵystyń jyldamdyǵy sekýndyna 2,7 metr bolǵan. Ózen aǵysynyń jyldamdyǵy sekýndyna 2 metr bolsa, sýasty izdeý jumystaryna ruqsat etiledi. Sondaı-aq, sý astynda bógde zattardyń kóp kezdesýi, sýdyń laı bolýy kóriný deńgeıin qıyndatqan.
Sý astynan izdestirý-qutqarý jumystaryna 10 qutqarýshy, 4 júzý quraly tartylǵan. Qutqarýshylarǵa polıtsııa qyzmetkerleri men eriktiler kómektesken.
Eske sala ketelik, buǵan deıin Atyraýda Jaıyqqa batqan aǵaıyndy jasóspirimder áli tabylmaǵanyn jazǵan edik.
