Atyraýda Jaıyqqa batqan aǵaıyndy jasóspirimder áli tabylǵan joq
Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, jasóspirimderdi izdeý 13 maýsym kúngi keshki mezgilden beri jalǵasyp jatyr.
«Sol kúni keshke Atyraý qalasynyń irgesindegi Geolog eldi mekeniniń tusynda bir top jasóspirimniń Jaıyq ózenine shomylýǵa barǵany anyqtaldy. Olar ózenniń shomylýǵa tyıym salynǵan belgi ornatylǵan jerinde sýǵa túsken. Sol kezde 2007 jáne 2008 jyly týǵan aǵaıyndy jasóspirimder sýǵa batyp ketken», - dep habarlady departamenttiń qoǵammen baılanys tobynan.
Búgin oblys ákiminiń orynbasary Qaırat Nurtaev pen tótenshe jaǵdaılar departamenti bastyǵynyń ýaqytsha mindetin atqarýshy, polkovnık Asqat Erjanov jasóspirimder sýǵa batqan orynǵa bardy.
Qutqarýshylar jasóspirimderdi keshe, 14 maýsymda da izdestirdi. Alaıda, ázirge nátıje joq. Al, búgin 15 maýsymda Jaıyq ózeninen izdestirýge 10 kutqarýshy, 4 qaıyq tartyldy. Olar izdestirý jumysyn áli jalǵastyryp jatyr. Qazir izdestirý jumysyna órt sóndirý qyzmeti bastyǵynyń orynbasary, jedel qutqarý jasaǵynyń bastyǵy Á.Jumalıev basshylyq jasaýda.
Atyraýda aǵaıyndy jasóspirimder Jaıyq ózenine batyp ketkenin jazǵan bolatynbyz.
Sondaı-aq, Atyraý oblysy sý aıdyndarynda shomylýǵa qaýipti 70 ýchaske baryn habarlaǵan edik.
Atyraý qalasynda – 17, Inder aýdanynda – 10, Mahambette – 19, Qurmanǵazyda – 2, Jylyoıda – 7, Qyzylqoǵada aýdanynda 15 qaýipti ýchaske bar. Qaýipti ýchaskelerde 238 tyıym salý belgisi men 9 aqparattyq stend ornatylǵan.
Atyraý oblystyq Tótenshe jaǵdaılar departamenti basshysynyń orynbasary Asqat Erjanovtyń málimetinshe, bıylǵy jyl basynan sýǵa batýǵa baılanysty 8 derek tirkelip otyr. Sý aıdyndarynan 4 adam qutqarylǵan. Sońǵy bir aptada 4 adam ajal qushqan.
