Atyraýda Jaıyqqa batqan 7 jasar balanyń máıiti tabyldy
Oblystyq tótenshe jaǵdaılar departamentiniń qoǵammen baılanys tobynan málim etkendeı, sýǵa batyp ketken denesi saǵat 14:19-da jaǵalaýǵa shyǵarylǵan.
«Atyraý qalasyna taıaý ornalasqan Qyzylbalyq aýylynda turatyn 7 jasar bala keshe, 14 tamyzda Jaıyq ózenine batyp ketken. Ol jaǵalaýda turǵan qaıyqtyń ústinde oınap júrip, ózenge qulaǵan. Ony izdeý jumysy sol kúni keshte saǵat 22:25-te bastaldy. Alaıda,
túngi mezgildegi izdeý nátıje bermeı, 15 tamyzda saǵat 00:27-de toqtatylǵan edi. Búgin, sýǵa ketken balany tańerteń saǵat 7:30-da qaıta jalǵasty», -dep habarlady departamenttiń qoǵammen baılanys toby.
Іzdestirý jumystaryna oblystyq tótenshe jaǵdaılar departamentinen 4 qutqarýshy, 1 júzý quraly, Atyraý qalalyq polıtsııa basqarmasynan 2 qyzmetker, 1 tehnıka jáne jergilikti 20 turǵyn men 1 júzý quraly tartylǵan.
Jyl basynan beri Atyraý oblysynyń sý aıdyndarynda jyl basynan beri 17 adam sýǵa batqan. Onyń ishinde Atyraý qalasynda 2, Mahambet aýdanynda 6, Qurmanǵazyda – 3 Jylyoıda – 2, Qyzylqoǵada – 2, Inder aýdanynda 2 adam sýǵa batyp ketken. Sý aıdyndarynda 6 jasóspirim kóz jumǵan.
«Bıyl sýǵa túsý maýsymy bastalǵan 1 maýsymynan beri 11 adam, onyń ishinde 5 bala qaza tapty. Departamentke qarasty jedel-qutqarý jasaǵynyń qutqarýshylary sýǵa batqan 6 adamdy qutqaryp qaldy. Onyń ishinde 3 bala bar. Sý aıdyndarynda adam ólimin boldyrmaý maqsatynda tótenshe jaǵdaılar departamenti qyzmetkerleri, polıtseılermen, Atyraý qalalyq jáne aýdandyq ákimdikterdiń ókilderimen birlesip kúndelikti úgit-nasıhat jumystaryn júrgizýde. Profılaktıkalyq is-sharalarǵa 273 adam men 44 avtokólik, júzý quraldary tartylyp otyr», -dep málim etti departamenttiń qoǵammen baılanys toby.
Buǵan deıin Atyraýda Jaıyqtyń jaǵasynda turǵan qaıyqta oınap júrgen bala sýǵa batyp ketkenin, keıin ony izdeý qaıta jalǵasqanyn habarlaǵan edik.
