Atyraýda Jaıyqqa batqan 7 jasar balany izdeý qaıta jalǵasty
Oblystyq tótenshe jaǵdaılar departamentiniń qoǵammen baılanys tobynan málim etkendeı, izdeý jumystary búgin, 15 tamyzda jergilikti ýaqytpen saǵat 7:30-da qaıta bastaldy.
«Keshe, 14 tamyzda saǵat 21:00 shamasynda Atyraý qalasynyń mańyndaǵy Qyzylbalyq aýylynda Jaıyq ózeniniń jaǵasynda turǵan qaıyqtardyń ústinde oınap júrgen 2015 jylǵy bala sýǵa qulap ketken. Ony izdestirý sol kúni saǵat 22:25-te bastalyp, 15 tamyzda saǵat 00:27-de toqtatylǵan edi», -dep habarlady departamenttiń qoǵammen baılanys tobynan.
Jaıyq ózenine batyp ketken balany izdeýge departamenttiń 4 súńgýiri men 1 tehnıkasy tartylǵan.
Ázirge sýǵa batyp ketken balany izdeý nátıje bergen joq.
Belgili bolǵandaı, bıylǵy jyl basynan beri óńirdegi ózen-kólderde 17 adam, onyń ishinde 6 jasóspirim sýǵa batyp ketken. Onyń ishinde Atyraý qalasynda 2, Mahambet aýdanynda – 6, Qurmanǵazyda – 3, Jylyoıda – 2, Qyzylqoǵada – 2, Inder aýdanynda – 2 adam.
«Bıyl sýǵa túsý maýsymy bastalǵan 1 maýsymynan beri 11 adam, onyń ishinde 5 bala qaza tapty. Departamentke qarasty jedel qutqarý jasaǵynyń qutqarýshylary sýǵa batqan 6 adamdy qutqaryp qaldy. Onyń ishinde 3 bala bar. Sý aıdyndarynda adam ólimin boldyrmaý maqsatynda tótenshe jaǵdaılar departamenti qyzmetkerleri, polıtseılermen, Atyraý qalalyq jáne aýdandyq ákimdikterdiń ókilderimen birlesip kúndelikti úgit-nasıhat jumystaryn júrgizedi. Profılaktıkalyq is-sharalarǵa 273 adam men 44 avtokólik, júzý quraldary tartylyp otyr», - dep málim etti departamenttiń qoǵammen baılanys tobynan.
Eske sala ketelik, budan buryn Jaıyqtyń jaǵasynda turǵan qaıyqta oınap júrgen bala sýǵa batyp ketkenin habarlaǵan edik.
