Atyraýda Jaıyq jaǵalaýyn lastaǵan 150-ge jýyq adam jazalandy

ATYRAÝ. QazAqparat – Atyraýda jyl basynan beri Jaıyq ózeniniń jaǵalaýyna qoqys tastaǵan 150-ge jýyq adam jazalandy, dep habarlaıdy QazAqparat.

Oblystyq ekologııa departamentiniń mamandary Jaıyq ózeni jaǵalaýynyń tazalyǵyna reıdtik is-shara ótkizip keledi.

«Qorshaǵan ortanyń tazalyǵyna ár adam jaýapty bolýy kerek. Ásirese, jaz aılaryndaǵy sýǵa túsý maýsymynda turǵyndar jaǵalaýǵa da, ózderi turatyn eldi mekende de qoqys qaldyqtaryn tastap ketedi. Balyq aýlaýshylar da qoqys qaldyǵyn tastaıdy. Sol sebepten, polıtsııa qyzmetkerlerimen birlesip Jaıyq ózeniniń Almaly, Bereke, Besikti, Talǵaırań, Aqsaı, Erkinqala, Damby aýyldyq okrýgteri tusyndaǵy jaǵalaýynda reıdtik is-shara ótkizildi. Maqsat – turǵyndarǵa qorshaǵan ortany lastamaýdyń mańyzyn túsindirip, ekologııalyq mádenıetin qalyptastyrýǵa yqpal etý. Jyl basynan beri qorshaǵan ortany búldirgen 150-ge jýyq adam ákimshilik jaýapqa tartylyp, árqaısysyna 5 aılyq eseptik kórsetkish mólsherinde aıyppul salyndy» -deıdi departamenttiń baspasóz hatshysy Elnara Oralqyzy.

Sondaı-aq, Jaıyq jaǵalaýynda alkogoldik ishimdik iship, qoqys tastaǵan 50-den astam adam jazalanǵan.

Eske sala ketelik, buǵan deıin Atyraý oblysynda zańsyz 130 qoqys úıindisi ǵaryshtan monıtorıngileý barysynda anyqtalǵan edi.