Atyraýda Jaıyq ózeniniń jaǵdaıy zertteletin bolady
ATYRAÝ. QazAqparat - Atyraýda Jaıyq ózenine ǵylymı zertteý jumystary júrgiziletin bolady. Bul maqsatqa oblystyq bıýdjetten 80 mln teńge bólindi, dep habarlaıdy «QazAqparat» HAA tilshisi Óńirlik kommýnıkatsııalar qyzmetine silteme jasap.
Oblystyq balyq sharýashylyǵy basqarmasynyń basshysy Artýr Sádibekulynyń málimetinshe, zertteý nátıjesi kóptegen kúrmeýli máselelerge jaýap berýge tıis.
«Biz qajetti biliktiligi jáne ǵylymı dárejesi bar barlyq tulǵalar qatysa alatyn tender jarııalaımyz. Basty maqsat - Jaıyq jáne Qıǵash ózenderindegi oqshaýlanǵan máselelerdi sheshý. Sonymen qatar sý qoımalaryndaǵy balyq resýrstaryn keńeıtýge jol ashý», - dedi A.Sádibekuly.
Tenderge qazaqstandyqtarmen qatar, sheteldik ǵylymı-zertteý toptary da qatysa alady. «Bizdegi sý qoımalaryn zertteýge arnalǵan keshendi jumys taıaý arada bastalýy tıis. Jáne úsh aıǵa, tipti odan artyq ýaqytqa sozylýy múmkin. Zertteý qorytyndysy boıynsha ekologııalyq jaǵdaı, lastaný sebepteri, sýdyń sapasy jáne taǵy basqa kúrdeli máselelerge baılanysty mamandardyń keńesin alǵymyz keledi. Bul naqty sheshim qabyldap, Jaıyq ózeniniń jaǵdaıyn jaqsartý boıynsha áreketter josparyn qurýǵa kómektesedi», - dep atap ótti A.Sádibekuly.
Jumys oblystyq ákimdik pen «Nur Otan» partııasy fılıalynyń bastamasymen júzege asyrylady.
Aıta keteıik, mundaı ǵylymı jumys aımaqta sońǵy 10 jyl kóleminde atqarylmaǵan.
