Atyraýda Jaıyq ózeniniń muzy oıylyp, sýǵa batqan er adam qutqaryldy
Oblystyq tótenshe jaǵdaılar departamentiniń qoǵammen baılanys tobynan málim etkendeı, oqıǵa búgin, 10 naýryzda tún ortasynda bolǵan.
«Atyraý qalasynyń Jumysker shaǵyn aýdany mańynda Jaıyq ózeniniń muzy oıylyp, 1 adam sýǵa túsip ketken. Bul departamenttiń dıspetcherlik pýltine búgin, 10 naýryzda túngi saǵat 01:04-te habar tústi. Belgili bolǵandaı, Jaıyq ózeniniń jaǵasynda túngi ýaqytta balyq aýlap otyrǵan 2 adam kómek suraǵan daýysty estigen. Olar ózen muzy oıylyp, sýǵa qulaǵan adamdy kórgen. Qutqarýshylarǵa habar berip, ózderi sýǵa batqan adamdy qutqarýǵa kirisken. Kómek suraǵan azamatty qaıyqqa mingizgenimen, ózderi muz ortasynda qalǵan», -dep habarlady departamenttiń qoǵammen baılanys toby.
Atyraý oblystyq tótenshe jaǵdaılar departamenti jedel-qutqarý jasaǵynyń qutqarýshylary oqıǵa ornyna jetip, muz ústinde qaıyqta otyrǵan 3 adamdy qutqarý jumysyn júrgizgen. Qutqarýshylar qaıyqty arqanmen jaǵaǵa súırep jetkizgen.
«Jaıyq ózenine sýǵa qulaǵan er adamnyń jasy shamamen 35-40-tiń aralyǵynda, al, ony qutqarýǵa tyrysqandar 1979 jylǵy er adam men 2004 jylǵy jasóspirim ekeni anyqtaldy. Úsheýi de jedel járdem brıgadasynyń qyzmetkerlerine tapsyryldy. Olardyń jaǵdaıy qalypty», -dep málim etti departamenttiń qoǵammen baılanys tobynan.
Qutqarýshylar aýa raıynyń jylynýyna baılanysty Jaıyq ózeniniń muzy erip, adam ómirine qaýip tóndiretinin eskertip otyr.
Eske sala ketelik, budan buryn Atyraýda muz oıylyp, Jaıyqqa túsip ketken eki adamnyń bireýi qutqarylǵanyn jazǵan edik.