Atyraýda Jaıyq ózenine taǵy bir bala batyp ketti
ATYRAÝ. QazAqparat - Atyraýda Jaıyq ózenine taǵy bir bala batyp ketti. Bul bıylǵy kóktemde ózen sýynda ajal qushqan tórtinshi sábı, dep habarlaıdy QazAqparat tilshisi.
«Qaıǵyly oqıǵa ózenge jaqyn ornalasqan Mahambet aýylynda boldy. Balalar úlkenderdiń qaraýynsyz sýdyń jaǵasynda oınap otyrǵan. Kenetten ózen jaǵasy opyrylyp, 2,5 jastaǵy ul bala sýǵa qulaǵan. Oqıǵa kýágeriniń shaqyrýymen qutqarýshylar 10 mınýttan keıin jetkenimen, baldyrǵandy qutqaryp qalý múmkin bolmady», - dep málimdedi QR ІІM TJK «Batys óńirlik aeromobıldik jedel-qutqarý jasaǵy» MM-niń basshysy Baqtııar Qadyrhanov.
Eske salaıyq, 2017 jyldyń kókteminde Jaıyq ózenine batqan bul tórtinshi bala. Ózen sýynan Mahambet aýylyndaǵy apaly-sińlili kishkentaı qyzdar, sál keıinirek qala mańyndaǵy ózge kentte ul bala ajal qushty. Barlyq balalar jaǵada úlkenderdiń qaraýynsyz bolǵan.
