Atyraýda Jaıyq ózenine 3,5 mln bekire tuqymdas balyq shabaǵy jiberildi
Balyq sharýashylyǵy komıtetiniń baspasóz qyzmetinen málim etkendeı, «Jaıyq-Atyraý» bekire balyq ósirý zaýytynyń mamandary Jaıyq ózenine 3,5 mln dana bekire tuqymdas balyq túrleriniń shabaǵyn jibergen.
«Bul jumys balyq resýrstaryn molaıtý jónindegi memlekettik tapsyrys sheńberinde bekire tuqymdas balyq túrleriniń qoryn saqtaý, qalpyna keltirý maqsatynda jyl saıyn júrgiziledi. Bekire shabaqtaryn sý aıdyndaryna jiberý Jaıyq-Kaspıı oblysaralyq basseındik balyq sharýashylyǵy ınspektsııasy qyzmetkerleriniń, jergilikti atqarýshy organ, qoǵamdyq jáne ǵylymı uıymdar ókilderiniń qatysýymen júzege asyryldy. Baǵaly bekire tuqymdasyna jatatyn qortpa, shoqyr, orys bekiresi, súırik balyqtarynyń shabaǵy zaýytta jasandy túrde ósirildi», -dep habarlady komıtettiń baspasóz qyzmeti.
Jyl saıyn Jaıyq ózeniniń uıyqtyq ýchaskelerinde bekire tuqymdas balyq túrleriniń atalyǵy men analyǵy aýlanady. Odan ári ınkýbatsııalaý úshin balyqtan tiri kúıinde ýyldyryq pen shoǵal alynady.
«Bıylǵy jyldyń 19 sáýirinde salmaǵy 190 keli qortpa aýlandy. Keıin odan tabıǵı meken etý ortasyna jiberý úshin ortasha salmaǵy 15 grammdy quraǵan 729 myń shabaq alyndy. Shabaqtar Jaıyq ózenine jiberildi. Buǵan qosa 629 myń dana súırik, 419 myń dana orys bekiresi men 1,723 mln dana orys bekiresiniń shabaǵy sý aıdynyna jol tartty», -dep málim etti baspasóz qyzmetinen.
Bıyl memlekettik tapsyrys sheńberinde tabıǵı mekendeý ortasyna baǵaly balyq túrleriniń 93,1 mln dana shaǵyn jiberý josparlanǵan. Onyń ishinde bekireniń 7,5 mln dana shabaǵy bar.
«Osy kezge deıin memlekettik kásiporyndar men jeke balyq ósirý sharýashylyqtary 69,4 mln dana balyq shabaǵyn ósirip, tabıǵı mekendeý ortasyna jiberdi. Balyq resýrsyn jasandy jolmen molaıtý jónindegi mundaı jumys jalǵas qazan aıyna deıin jalǵasady», -dep túıindedi komıtettiń baspasóz qyzmeti.
Eske sala ketelik, budan buryn Atyraý balyqshylary 200 keli tartatyn alyp qortpa aýlaǵanyn habarlaǵan edik.
