Atyraýda jataqhanadaǵy órttiń sebebi meıramnan keıin jarııalanady
ASTANA. QazAqparat - Atyraýda birneshe adamnyń ómirin jalmaǵan jataqhanadaǵy órttiń sebebi meıramnan keıin anyqtalady. Bul týraly Úkimet úıindegi baspasóz máslıhatynda QR Eńbek jáne halyqty áleýmettik qorǵaý vıtse-mınıstri Nurjan Áltaev aıtty, dep habarlaıdy QazAqparat.
«Atyraý oblysyna qarasty Qarabatan eldi mekenindegi oqıǵaǵa baılanysty qazirgi ýaqytta tekserý júrip jatyr. Zańnamaǵa sáıkes tekserý júrgizýge 10 kún beriledi. Bizdiń ınspektorlarymyz qazirgi ýaqytta Tótenshe jaǵdaılar komıtetimen birge oqıǵa ornynda jumys isteýde. Tekserý aıaqtalǵanǵa deıin qandaı da bir málimdeme jasaýǵa nemese atalǵan tekserýdiń qorytyndysy jaıynda aıtýǵa quqymyz joq. Bári daıyn bolǵan soń meıramnan keıin atalǵan tekserý nátıjelerin BAQ-ta resmı túrde jarııalaımyz», - dedi vıtse-mınıstr BAQ ókilderiniń saýalyna oraı.
Onyń atap ótýinshe, aldyn ala boljamǵa sáıkes órt elektr jelileriniń qysqa tuıyqtalýynan oryn alǵan.
«Biz oqıǵa ornyn tolyqtaı qarap shyqtyq. Sol jerde jumys isteıtin ujymmen kezdestim. Onda 800-den astam qazaqstandyq jumys isteıdi. Qurylys alańyndaǵy jumystar toqtatylady degen sheshim qabyldandy. Jumysshylardyń basym bóligi úılerinen qaıtarylady. Olar negizinen ońtústik óńirlerdiń týmasy. Buǵan qosa, jumys berýshi jataqhanalar tolyqtaı tekserý ótkenshe, normaǵa sáıestendirilgenshe ýaqytsha úılerine qaıtarylǵan adamdarǵa da jalaqy tólep turý mindettemesin moınyna aldy», - dedi Nurjan Áltaev.
Onyń aıtýynsha, jumys berýshide taǵy 2 úlken jataqhana bar. Olar barlyq talaptarǵa saı keledi. Sondyqtan olarǵa 200 adam ornalastyrylyp, olar qalǵan jataqhanalardy retke keltirýge nemese jańa jataqhana salýǵa jumyldyrylady.
Sonymen qatar ol qaza tapqandardyń otbasylaryna saqtandyrý kompanııasy ótemaqy tóleıtindigin atap ótti. Al zardap shekkenderge jumys berýshi tarapynan qosymsha kómek kórsetý zańnamada qarastyrylmaǵan.
«Qaza tapqandarǵa qatysty aıtarym, jumys berýshi barlyq shyǵyndardy tolyqtaı óz moınyna aldy. Biz tekserip shyqtyq. Olarmen eńbek kelisimsharty, saqtandyrý kelisimsharty jasalǵan. Olardyń barlyǵy da saqtandyrylǵan. Tekserý nátıjesinde saqtandyrý kompanııasy qaza tapqandardyń otbasyna barlyq ótemaqyny tóleıdi. Úsh adam jaraqat aldy, ekeýi aýrýhanada, bireýi shyqty. Aýrýhanada jatqan jumysshylarǵa saqtandyrý tólenedi. Jumys berýshi óz bastamasymen olarǵa zańnamada qarastyrylmasa da qosymsha materıaldyq kómek kórsetpek», - dedi Nurjan Áltaev.
Buǵan deıin habarlaǵanymyzdaı, Atyraý qalasynan shamamen 40 shaqyrym jerdegi Qyzylqoǵa aýdanynda salynyp jatqan Qarabatan «Gaztýrbınalyq elektr stansysynyń» qurylys aýmaǵynda ornalasqan jataqhana órtendi. 6 adam qaza bolyp, 4-eýi zardap shekti.
