Atyraýda «Jasyl el» eńbek jasaǵyna 1000 jas tartylady
Óńirlik kommýnıkatsııalar qyzmetiniń habarlaýynsha, Atyraý oblysynda 10 shildede «Jasyl el» eńbek jasaǵynyń jańa maýsymy bastalady. Oblysta bıylǵy eńbek maýsymynda myń jasty jumyspen qamtý kózdelip otyr. Onyń ishinde 300 jas Atyraý qalasynyń aýmaǵynda, al, ár aýdanda 100 sarbaz jumys isteıdi.
«Jasyl el» jastar jasaǵynyń jetekshisi Abylaı Qurmetulynyń aıtýynsha, búginde aımaqtyń tabıǵatyn qorǵap, kórkeıtý úshin 700-ge jýyq adam ótinish bildirip úlgergen.
«Jańa maýsymǵa tirkeý onlaın rejımde júrgizilip jatyr. Qazirgi ýaqytta ótinish bildirýshi 671 adam bar. Biraq, olardyń bári birdeı jaramdy degen sóz emes. Tirkelýshilerdiń qujattary qosymsha tekseriledi. Atap aıtar bolsaq, jeke kýálik, Kaspi Gold 20 sany, 18 jasqa tolmasa ata-anasynyń ruqsat qaǵazy kerek. Barlyq sarbazdar qolǵappen, maskamen qamtamasyz etiledi. Olar araqashyqtyqty saqtap jumys isteıtin bolady», - deıdi Abylaı Qurmetuly.
Joba aıasynda bıyl da ádettegideı barlyq aýdanda jáne Atyraý qalasynda aı saıyn #TrushtagAtyrau aktsııasy uıymdastyrylmaq. Sondaı-aq, oblys jastary arasynda ekologııalyq mádenıet pen aýyl sharýashylyǵyn damytýǵa baǵyttalǵan keminde 10 is-sharany ótkizý josparlanǵan.
Eske sala ketelik, budan buryn Atyraýda 1,1 myńnan astam JOO túlegi jastar tájirıbesine jiberilgeli otyr.
