Atyraýda jastar úshin 220 páter salynyp jatyr
ASTANA. QazAqparat - Atyraý oblysynda jastarǵa arnalyp barlyǵy 220 páter bolatyn úıler salynyp jatyr. Olardyń 120 páteri bıylǵy naýryzda aıaqtalady dep josparlanǵan, al qalǵan 100 páterli úıdiń qurylysy endi bastaldy.
Úıler jas otbasylarǵa arnalǵan «Jas Otaý» baǵdarlamasy boıynsha turǵyzylyp jatyr. Bul týraly Atyraý oblysynyń ákimi Nurlan Noǵaev ákimdikte ótken kezekti jınalysta aıtty.
Degenmen, aımaq basshysy bul páterlerdiń azdyq etetinin, jastarǵa degen qoldaýdy barynsha údetý qajet ekenin aıtty.
«Bıyl tapsyrylaıyn dep otyrǵan 120 páterdiń árqaısysyna 10 adamnan kelip otyr. Úı alyp, úı bolýǵa muqtaj adamdar kóp. Olardyń bárine qoldaý kórsetip jatyrmyz. Solardyń ishinde jastarǵa da arnaıy kóńil bólýimiz kerek. Sebebi, jastar - qoǵamnyń lokomotıvi. Qazir bul jobany iske asyrýǵa Shyǵys Qazaqstan oblysy men Almaty qalasy nıet bildirip otyr», - dedi Noǵaev.
Oblys ákimi jastardy bireýden kómek kútpeı, aıanbaı eńbek ete bilýge shaqyrdy.
«Sizderde bizdiń oıymyzǵa kele bermeıtin ıdeıalar óte kóp. Oılaryńyz tyń. Qazirgi tehnologııalardyń kópshiligin sizder sekildi jastar oılap shyǵarǵan. Boılaryńyzdaǵy potentsıaldy paıdalanyp, ózderińiz jaryp shyǵýlaryńyz kerek», - dedi aımaq basshysy.
Aıta ketelik, byltyr Atyraýda «Dıplommen aýylǵa» baǵdarlamasy boıynsha 41 jas maman bıýdjettik nesıe alyp, 113-i kóterme járdemaqy alǵan. Sonymen qatar, 298 adam turaqty jumysqa ornalasty. 27 jas kásipkerdiń alǵan nesıeleri sýbsıdııalanyp, 23 kásipkerdiń nesıesi kepildendirildi. Sonymen birge bıyl Atyraý qalasynda «Jastar saraıynyń» qurylysy josparlanyp otyr, dep habarlaıdy ákimdiktiń baspasóz qyzmetinen.
