Atyraýda jasóspirimdi qaǵyp óltirgen júrgizýshi sotta jaýap berdi

ATYRAÝ. QazAqparat – Atyraýda jaıaý júrginshiler jolynda 16 jastaǵy jasóspirimdi qaǵyp ketken «Toıota Kamrı» kóliginiń júrgizýshisi sot aldynda jaýap berdi, dep habarlaıdy QazAqparat.

Jol apaty ótken jylǵy qyrkúıekte bolǵan edi. Oqıǵa beınebaqylaý kamerasyna túsip qalǵan. Vıdeo áleýmettik jelide taralyp, halyq arasynda qoǵamdyq rezonans týǵyzdy.

Vıdeoda «Toıota Kamrı» men «Mersedestiń» kóshede óte qatty jyldamdyqpen kele jatqany kórinip tur. Joldy kesip ótip bara jatqan bozbala jalt burylyp, «Mersedestiń» astyna túsýden aman qalsa da, ony ekinshi jaqtan «Toıota» kelip soqty.

Sarapshylar «Mersedestiń» saǵatyna - 136 shaqyrym, al «Toıotanyń» saǵatyna - 143 shaqyrym jyldamdyqpen júıtkigenin anyqtady.

«Toıota» júrgizýshisi QR QK 345-baby 3-bóliginde aıtylǵan qylmysty jasady. Bul qylmys boıynsha qarastyrylǵan eń aýyr jaza – 5 jylǵa bas bostandyǵynan aıyrý», - dep málim etti oblystyq prokýratýra.

Eske sala keteıik, ótken jyldyń qyrkúıeginde Atyraýdaǵy Baımuhanov kóshesinde «Toıota Kamrı» avtokóligi jaıaý júrginshini qaǵyp ketti. Jas bala oqıǵa ornynda kóz jumǵan bolatyn.