Atyraýda jas talanttarǵa arnalǵan 100 oryndyq jataqhana ashyldy
ATYRAÝ. QazAqparat - Búgin Atyraý mýzykalyq kolledjiniń "D.Nurpeıisova atyndaǵy halyq mýzyka akademııasy" 100 oryndyq jańa jataqhanasy saltanatty túrde paıdalanýǵa berildi, dep xabarlaıdy QazAqparat tilshisi.
Sharada oblystyq bilim berý basqarmasynyń basshysy Qaıyrǵalı Kenjeǵalıev jańa jataqhananyń salynýy stýdentter úshin mańyzdy ekenin aıtty.
"Memleket basshysynyń tapsyrmasyna sáıkes, bes áleýmettik bastamada kórsetilgen jataqhana salý məselesi boıynsha, óńirimizde júıeli jumys júrgizilýde. Bul kolledjde bilim alyp jatqan stýdentter úshin qýanyshty oqıǵa. Jańa ǵımarat stýdentterdiń oqýyna jəne óz ýaqyttaryn jaıly jaǵdaıda ótkizýge múmkindik beredi", - deıdi Qaıyrǵalı Kenjeǵalıev.
Memleket basshysy Nursultan Nazarbaevtyń jaqynda bolǵan sapary kezinde H.Dosmuhamedov atyndaǵy Atyraý memlekettik ýnıversıtetiniń jańa jataqhanasyna barǵanyn oblystyq bilim berý basqarmasynyń basshysy eske saldy.
400 orynǵa eseptelgen ǵımaratty «KazTransOıl» AQ berdi.
"Stýdentterdi jataqhanamen qamtamasyz etý boıynsha jumys jalǵasady. Kóp uzamaı eki jataqhananyń qurylysy bastalady. Sondaı-aq, segiz jataqhana qurylysynyń jobalyq-smetalyq qujattamasy daıyndalýda. Bul jataqhanalar 1000-nan astam stýdentterdi qamtıtyn bolady.
Budan bólek, Isataı aýdanynda ornalasqan kolledjdiń 100 oryndyq jataqhanasynyń qurylysy júrip jatyr. Sondaı-aq, Atyraý ınjenerlik-gýmanıtarlyq ınstıtýtynyń jataqhana qurylysy júrgizilýde", - deıdi Qaıyrǵalı Kenjeǵalıev.
Aıta ketelik, búgingi tańda mýzykalyq kolledjde 222 stýdent bilim alýda. Oqý ornynyń ujymy jyl saıyn túrli halyqaralyq jarystarǵa qatysyp, ónerlerin Reseı, Túrkııa jáne Italııa eldirinde kórsetip keledi. D.Nurpeıisova atyndaǵy halyq mýzyka akademııasynyń túlekteri - Qazaqstan men Reseı elderindegi JOO-daǵy bedeldi stýdentteri.
