Atyraýda jas polıtseıler Tuńǵysh Prezıdentke arnalǵan ekskýrsııalyq sabaqqa qatysty

ATYRAÝ. QazAqparat – Atyraýda jas polıtseıler oblystyq Tarıhı-ólketaný mýzeıinde Tuńǵysh Prezıdentke arnalǵan ekskýrsııalyq sabaqqa qatysty, dep habarlaıdy QazAqparat.

Oblystyq tarıhı-ólketaný mýzeıinde Tuńǵysh Prezıdent kúnine arnalǵan ekspozıtsııa qoıyldy. Onda Nursultan Nazarbaevtyń memleketti basqarý, táýelsiz Qazaqstandy álem tanyǵan el retinde qalyptastyrý kezeńindegi qaıratkerligi, eren eńbegi týraly tarıhı, derekti qujattar túrindegi qundy jádigerler bar. Oblystyq Polıtsııa departamentiniń jas mamandary úshin atalǵan mýzeıge ekskýrsııalyq sabaq uıymdastyryldy.

«Tuńǵysh Prezıdent kúnine oraı uıymdastyrylǵan sharanyń basty maqsaty – jas mamandardy patrıotızmge, jaýapkershilikke, bastamashyldyqqa tárbıeleý. Osy oraıda Ult Kóshbasshysy Nursultan Nazarbaevtyń joǵary adamgershilik qasıeti, memleketshildigi men tabandylyǵy ár jasqa úlgi-ónege bolary daýsyz. Táýelsiz Qazaqstannyń áleýmettik-ekonomıkalyq, quqyqtyq turǵyda órkendeýine úles qosqysy keletin ár qyzmetkerdiń boıynan osyndaı qasıetter tabylyp jatsa, elimizdiń bolashaǵy búgingiden jarqyn bolary anyq», - deıdi departament bastyǵynyń orynbasary Ádilhan Baıdosov.

Onyń aıtýynsha, ekskýrsııalyq sabaq barysynda Tuńǵysh Prezıdent-Elbasy Nursultan Nazarbaevtyń ómiri men qyzmetine, saıasatkerligine arnalǵan ekspozıtsııa tanystyryldy. Álemdik deńgeıdegi memleket qaıratkeriniń elimizdiń damýyna sińirgen eńbegi týraly keńinen aıtyldy.

Eske sala ketelik, budan buryn Atyraýda memlekettik qyzmetshilerdiń alleıasy ashylyp, Tuńǵysh Prezıdent kúnine oraı ǵylymı-tájirıbelik konferentsııa ótkenin habarlaǵan edik.