Atyraýda jas qyzdy soqqan júrgizýshi tutqyndaldy
ATYRAÝ. QazAqparat - Atyraýda polıtsııa qyzmetkerleri 17 qańtar kúni qyzdy qaǵyp óltirip, jol-kólik apaty ornynan jasyrynǵan júrgizýshini ustady, dep habarlaıdy «QazAqparat» HAA tilshisi.
«Búgin polıtseıler Atyraý-Damba tas jolynda 14 jasar qyzdy qaǵyp óltirgen kólikti tapty. Qyz alynǵan jaraqattar saldarynan oblystyq aýrýhanada kóz jumdy. Qylmysty qara tústi «Lada Priora» kóligimen jasaǵan. Kóp keshikpeı qyzdy soǵyp, zardap shegýshige alǵashqy medıtsınalyq kómek kórsetpeı qashyp ketken júrgizýshi tutqyndaldy. Kináli 1983 jyly týǵan Atyraý qalasynyń turǵyny bolyp shyqty. Qazirgi tańda sotqa deıingi tergeý aıasyndaǵy jedel-tergeý is-sharalary júrgizilýde», - dep málimdedi oblystyq ІІD baspasóz qyzmetiniń basshysy Gúlnazıra Muhtarova.
