Atyraýda jas ananyń ólimine qatysty sotqa deıingi tergeý bastaldy
ATYRAÝ. QazAqparat - Atyraýda jas bosanǵan áıeldiń ólimine baılanysty sotqa deıingi tergeý amaldary bastaldy, dep habarlaıdy QazAqparat tilshisi.
Óńirdiń polıtsııa departamenti habarlaǵandaı, sotqa deıingi tergeý amaldary QR QK 317-baby (medıtsına nemese farmatsevtıka qyzmetkerleriniń kásibı mindetterin tıisti deńgeıde atqarmaýy) boıynsha júrgizilýde.
Eske sala keteıik, aldyn ala boljam boıynsha, áıel adam qan tamyrynyń qaǵanaq suıyqtyǵymen bitelip qalýynan qaıtys bolǵan. Óziniń jáne sábıiniń ómirine qaýip tónip turǵandyqtan, ol Isataı aýdanynan oblystyq perzenthanaǵa kelip túsken. Kelinshekke kesar tiligin jasaý týraly sheshim qabyldandy. Ota sátti ótip, sábı ómirge asqynýsyz keldi. Alaıda belgisiz sebeptermen birneshe saǵattan keıin jańa bosanǵan ananyń jaǵdaıy nasharlaı túsken. Onyń ómirin saqtap qalý múmkin bolmady.
Tıisti saraptamalar jasalǵannan keıin kelinshektiń ólimine ákep soqqan sebepter belgili bolady.
Avtor: A.Sokolov
