Atyraýda jantúrshigerlik jol apatynan keıin rýldegi jasóspirim aýrýhanaǵa tústi

ATYRAÝ. QazAqparat – Atyraýda eki kólik soqtyǵysyp, 2 adam aýrýhanaǵa tústi. Onyń biri – kámeletke tolmaǵan jasóspirim, dep habarlaıdy QazAqparat tilshisi.

Jol-kólik oqıǵasy búgin, 1 maýsymda jergilikti ýaqytpen saǵat 12:20 shamasynda bolǵan. Bul týraly áleýmettik jelide vıdeo tarady.

Atyraý qalalyq polıtsııa basqarmasy patrýldik polıtsııa batalony komandıriniń orynbasary Ersin Qojahmetovtiń aıtýynsha, munaıly shahardan Damby baǵytyna qatynaıtyn joldyń Qyzylbalyq eldi mekeni tusynda eki kólik soqtyǵysqan.

Onyń biri – VAZ – 2141, ekinshisi – Honda Odyssey kóligi. Kóliktiń birin kámeletke tolmaǵan jasóspirim basqarǵan. Jasóspirimniń jasy – 17-de.

«Kólik júrgizýshilerine jolda júrý erejesin qatań saqtaýdy eskertemiz. Jol-kólik apaty adam ómirine qaýip tóndiretinin árdaıym este ustaǵan jón», -dep málim etti Ersin Qojahmetov.

Oblystyq densaýlyq saqtaý basqarmasynyń baspasóz qyzmetinen málim etkendeı, jol-kólik apaty týraly 103 pýltine saǵat 12:30-da habar túsken.

«Shaqyrtýǵa baılanysty oqıǵa ornyna jedel járdem brıgadasy jiberildi. Oqıǵa ornynda bir eresek adam men bir jasóspirimge alǵashqy medıtsınalyq kómek kórsetildi. Qazir zardap shekken olar ártúrli dene jaraqatymen oblystyq aýrýhana men oblystyq balalar aýrýhanasyna jetkizildi», -dep habarlady basqarmanyń baspasóz qyzmeti.

Áleýmettik jelide «Aýyr dene jaraqatyn alǵan mektep túlekteri bar. Olar kóliktiń terezesinen denesin shyǵarǵan» degen aqparat taraǵan edi.

Bul derekti oblystyq polıtsııa departamentiniń baspasóz qyzmeti joqqa shyǵardy.

Eske sala ketelik, budan buryn Atyraý oblysynda bıylǵy úsh aıda jol-kólik oqıǵalary 15,2 paıyzǵa azaıǵanyn jazǵan bolatynbyz.

Oblystyq polıtsııa departamentiniń bastyǵy Nurhat Orazbaevtyń málimetinshe, jyl basynan bergi úsh aıda jol-kólik oqıǵalarynyń sany 15,2%-ǵa azaıǵan. Jol apatynan qaza bolǵandar sany 80%-ǵa, jaraqat alǵandar 7,1%-ǵa tómendegen.

Sondaı-aq, KamAZ kóligi qaqqan 6 jasar bala mert bolǵanyn habarlaǵan edik.