Atyraýda jansaqtaý bóliminde jatqan 10 naýqastyń jaǵdaıy aýyr
ATYRAÝ. QazAqparat – Atyraýda koronavırýs juqtyryp, jansaqtaý bóliminde jatqan 10 naýqastyń jaǵdaıy aýyr, dep habarlaıdy QazAqparat.
Oblystyq densaýlyq saqtaý basqarmasy basshysynyń orynbasary Qaısar Abdalıevtyń málim etýinshe, ınfektsııalyq statsıonarlarda barlyǵy 464 patsıent em qabyldap jatyr. Óńirdegi ınfektsııalyq statsıonarlardyń júktemesi 24%-dy quraıdy.
«Atyraý qalasyndaǵy №2 oblystyq aýrýhanada 8, modýldik statsıonarda 123, Teńiz ken ornyndaǵy ınfektsııalyq statsıonarda 309 naýqas emdelip jatyr. Sondaı-aq, Jylyoı aýdandyq aýrýhanasynda – 4, Inder aýdandyq aýrýhanasynda – 7, Isataı aýdandyq aýrýhanasynda – 1, Qurmanǵazy aýdandyq aýrýhanasynda – 3, Qyzylqoǵa aýdandyq aýrýhanasynda – 4, Mahambet aýdandyq aýrýhanasynda 5 naýqas emdelýde», - deıdi Qaısar Abdalıev.
Onyń aıtýynsha, Sovid-19 dıagnozymen jansaqtaý bóliminde 13 naýqas túsken. Onyń ishinde 10 naýqas aýyr halde, úsh naýqas óte aýyr halde jatyr. Al, eki patsıent ókpeni jasandy jeldetý apparatyna qosylǵan. Atyraý oblysynda 430 tósektik rezervtik ınfektsııalyq statsıonar daıyndalǵan.
Eske sala ketelik, budan buryn Atyraýda bir táýlikte 93 adamnan koronavırýs anyqtalǵan edi.
