Atyraýda janarmaıy taýsylyp, dalada qalǵan kólikten 4 adam qutqaryldy
Oblystyq tótenshe jaǵdaılar departamentiniń qoǵammen baılanys tobynan málim etkendeı, Aqtóbe oblysynyń 4 turǵyny jolǵa shyǵyp, dalada qalyp qoıǵan.
«Aqtóbe oblysynyń Baıǵanın aýdanyndaǵy Mııaly aýylynan 4 adam kólikpen jolǵa shyǵyp, Atyraý oblysyndaǵy Qulsary qalasyna barmaq bolǵan. Olar jolǵa 16 aqpanda shyqqan. Alaıda, jolaýshylar Jylyoı aýdanynyń ortalyǵy – Qulsary qalasyna jetpegen, ne keri aýylyna oralmaǵan. Týystary olardan esh habar almaǵan», - dep habarlady departamenttiń qoǵammen baılanys toby.
Atyraý oblystyq tótenshe jaǵdaılar departamentine Aqtóbe oblysynan jolǵa shyǵyp, habarsyz ketken 4 adamnyń joǵalǵany týraly habar keshe, 17 aqpanda túsken. Soǵan baılanysty departamenttiń qutqarý tobynan 5 qyzmetker joǵalǵan adamdardy izdeýge jedel kirisken.
«Qutqarýshylar izdestirý jumysyn júrgizip, Qulsary qalasynan 120 shaqyrym qashyqtyqtaǵy «Namaztaqyr» ýchaskesinen 4 adamdy aman-esen tapty. Jolaýshylardyń aıtýynsha, kóliktiń janarmaıy taýsylyp, elsiz dalada toqtap qalǵan. Kólikte 1976, 1979 jylǵy eki er adam, 44 jastaǵy áıel men 2018 jyly týǵan qyz bolǵany anyqtaldy», - dep málim ett departamenttiń qoǵammen baılanys tobynan.
Jolda qalǵan jolaýshylardyń densaýlyǵyna zardap kelmegen. Sol sebepten, olar medıtsına qyzmetkerleriniń kómegine júgingen joq.
Eske sala ketelik, buǵan deıin Atyraý oblysynda joǵalyp ketken malshy bir kúnnen keıin aman tabylǵanyn, keıin tún ishinde qar qursaýynda qalǵan kólikten ana men bala qutqarylǵanyn jazǵan edik.