Atyraýda jańa týǵan nárestesin qoqys jáshigine tastaǵan áıel sottaldy
Bıylǵy qańtarda Atyraý oblysynda kópbalaly áıel jańa týǵan nárestesin qoqys jáshigine tastaǵanyn jazǵan edik.
Keıinnen belgili bolǵandaı, jantúrshigerlik oqıǵa Qyzylqoǵa aýdanyndaǵy Saǵyz aýylynda bolǵan.
Burynnan 4 balasy bar áıel júktiligine baılanysty dárigerlik esepke turmaǵan.
Júkti áıel aýdandyq jedel járdem stansasyna qan ketip, jaǵdaı qıyndaǵan soń ǵana habar bergen.
Medıtsına qyzmetkerleri alǵashqy kómek kórsetý kezinde 35 jastaǵy kelinshektiń bosanǵanyn anyqtaǵan.
Alaıda, áıel bastapqyda bosanǵanyn moıyndamaı, túsikten keıingi qan ketý dep jaltarǵan.
Osy derekke baılanysty QR Qylmystyq kodeksiniń 100-babymen (Jańa týǵan balany anasynyń óltirýi) is qozǵaldy.
«Sot sheshim shyǵarý kezinde kúıeýimen ajyrasqannan keıin áıeldiń kámeletke tolmaǵan 4 balasy qalǵanyn eskerdi. Sottalýshy bir jarym jylǵa bas bostandyǵynan aıyryldy» -dep habarlady oblystyq sottyń baspasóz qyzmeti.