Atyraýda jańa týǵan qyzyn kóshege qaldyryp ketken áıel tabyldy
ATYRAÝ. QazAqparat – Atyraýda jańa týǵan qyzyn dalaǵa tastaǵan áıel ustaldy, dep habarlaıdy QazAqparat.
«Áıel jedel basqarý ortalyǵynyń (JBO) beınebaqylaý kameralarynyń kómegimen tabyldy. Ustalǵan áıel 1998 jylǵy Oral turǵyny bolyp shyqty. Ol Atyraýǵa balasyn bosanyp, odan qutylý úshin ádeıi kelgen»,-dep habarlady óńirlik Polıtsııa departamentiniń baspasóz qyzmeti.
Aıta keteıik, Atyraýda jylý trassasynyń boıynan jańa týǵan qyz balanyń tabylýyna baılanysty 119 baptyń 1-shi bóligi boıynsha sotqa deıingi tergeý bastaldy.
Sársenbi kúni Avangard shaǵyn aýdanynda jergilikti turǵyndardyń biri jylý jelisiniń boıynan jańa týǵan sábıdi taýyp alǵan. Náreste oblystyq balalar aýrýhanasyna jetkizilgen. Atalǵan fakti boıynsha sotqa deıingi tergeý bastaldy.
Vedomstvo ókilderi atalmysh qylmystyń 100 aılyq eseptik kórsetkish kóleminde aıyppul tóleýdi jáne osy kólemde túzeý maqsatyndaǵy jumystardy atqarýdy, sondaı-aq 120 saǵattyq qoǵamdyq jumysqa tartý nemese 45 táýlikke qamaýǵa alý jazasyn qarastyratynyn aıtty. Eger qaýqarsyz adamǵa abaısyzda aýyr nemese orta deńgeıdegi zaqym keltirse 2 myń aılyq eseptik kórsetkish kóleminde aıyppul tóleıdi nemese osy kólemde túzeý maqsatyndaǵy jumystardy atqarady, sondaı-aq eki jylǵa bas bostandyǵy shektelip, bolmasa osy merzimge qamaýǵa alynýy múmkin.
Osyǵan deıin káriz kollektorynyń janyna tastap ketken náresteni qutqarý jumystary júrip jatqany habarlanǵan bolatyn.
Sondaı-aq osy oqıǵaǵa baılanysty sotqa deıingi tergeý bastalǵany aıtyldy.
A.Sokolov
