Atyraýda jańa órt sóndirý deposy ashyldy

ATYRAÝ. QazAqparat- Atyraýda TJD órt sóndirý jáne apattyq-qutqarý jumystary qyzmetiniń №3 mamandandyrylǵan bólimshesiniń órt-sóndirý deposy ǵımaraty saltanatty túrde Samal yqshamaýdanynda ashyldy, dep habarlaıdy QazAqparat tilshisi.

Saltanatty sharaǵa Atyraý oblysynyń ákimi Nurlan Noǵaev qatysty. Aımaq basshysy jańa órt sóndirý deposynyń ashylýy Atyraý oblysynyń órt sóndirý bólimsheleriniń qashyqtaǵy yqsham aýdandar men eldi mekenderdegi jumysyn jedeldetýde mańyzy zor ekenin atap ótti.

«Búgingi tańda memlekettiń negizgi basymdyǵy da, Tótenshe jaǵdaılar departamentiniń maqsaty da aımaqtaǵy órt sóndirý, órtten qorǵaý jáne apattyq-qutqarý jumystaryn júrgizýdiń nátıjeliligin arttyrý. Jańa mamandandyrylǵan órt sóndirý bólimshesi turǵyndardyń qaýipsizdigin qamtamasyz etip qana qoımaı, 100 jańa jumys ornyn da usynyp otyr», - dedi Nurlan Noǵaev sharaǵa qatysýshylarǵa. Jańa órt sóndirý deposynda tórt aımaqqa - negizgi, óndiristik, turmystyq jáne jattyǵý-sporttyq bolyp bólingen. Qyzmetkerlerdiń ónimdi eńbek etýi úshin barlyq jaǵdaı jasalǵan: demalys bólmesi, psıhologııalyq tynyǵý bólmesi, jattyǵý zaly, as bólmesi, dýsh kabınalary, keń bólmeler, syıymdylyǵy júz adamnan asatyn keńesý zaly men 30 adamǵa arnalǵan oqý synyby.

Óndiristik aımaqta baqylaý-ótkizý pýnkti, avtoturaq, qos rezervýarly janar-jaǵarmaı quıý beketi ornalasqan. Jattyǵý-sporttyq aımaqta jattyǵý munarasy, 100 metrlik kedergili jol, sondaı-aq, basketbol men mını-fýtbolǵa arnalǵan alańdar bar. Negizgi ǵımarattyń úshinshi qabatynda 40 adamǵa eseptelgen jataqhana ornalassa, tórtinshi qabatta qajetti jıhazben jabdyqtalǵan 7 páter oryn tepken. Jalpy, jergilikti atqarýshy organdardyń qarjylyq qoldaýynyń arqasynda Atyraý oblysy boıynsha TJD bólimsheleriniń materıaldy-tehnıkalyq bazalary jyl saıyn jańartylyp kele jatqanyn atap ótý kerek.