Atyraýda jańa oftolmologııalyq ortalyq ashyldy
ATYRAÝ. QazAqparat - Atyraý oblystyq oftalmologııalyq aýrýhana jańa kómek ǵımaratyn ashty. Jańa konsýltatsııalyq-dıagnostıkalyq kómek ǵımaraty 100 adamdy qabyldaýǵa arnalǵan, dep habarlaıdy Atyraý oblystyq Óńirlik kommýnıkatsııalar qyzmeti.
Atalǵan ǵımarat qurylysy 3 jyl buryn bastalǵan. 2008 jyly ashylǵan oblystyq oftalmologııalyq aýrýhananyń eski ǵımaraty naýqastardy tolyq qabyldaı almaıdy. Sol sebepti aýrýhana ujymy aýrýhanany keńeıtý isin qolǵa alǵan.
«Oblysymyzda sońǵy 1-2 jylda kelýshiler sany artty. Bul bir jaǵynan mamandar qabiletiniń jaqsarǵanyn kórsetse, bir jaǵynan turǵyndardyń kózderiniń kórýi nasharlaǵanynyń dáleli. Naýqastar kóbeıgen soń bizge jańa emdeý bólmeleri qajet boldy. Osy turǵyda ujymmen aqyldasyp, jańa ǵımarat qurylysyn 3 jyl buryn bastaǵan bolatynbyz. Ǵımarat tolyqtaı aýrýhana qarajatyna salyndy. Endigi maqsat - balalar men jasóspirimderdiń kózin emdeý qabiletin jaqsartý. Osy maqsatta aýrýhana dárigerleri Reseıge baryp, tájirıbe almasýda. Sonymen qatar, shetelderden jańa tehnologııalar ákelý jumystary jalǵasýda»,-deıdi bas dáriger Murat Qusaınov.
Onyń sózinshe, jańa ǵımaratta kúndelikti 100 adam qabyldaıtyn ambýlatorlyq hırýrgııa jáne dıagnostıkalyq ortalyq jumys isteıdi. Aldaǵy ýaqytta basshylyq kóz kórýin qalypqa keltirýge arnalǵan taǵy da 2 kabınet ashýdy josparlap otyr.
