Atyraýda jańa kárizdik tazartý qondyrǵysy iske qosylyp, «Sasyqsaı» jabylady
ASTANA. QazAqparat - Atyraý oblysynyń ákimi Nurlan Noǵaev oblys ortalyǵynyń sol jaq bóliginde salynyp jatqan káriz sýyn tazartý kesheniniń qúrylysyn tekserdi, dep habarlaıdy Atyraý oblysynyń Óńirlik kommýnıkatsııalar qyzmei.
Keshende bas káriz stansasy alańy, káriz tazartý ǵımaraty alańy, bıologııalyq toǵan alańy men býlaný alańy bar. Aımaq basshysy mamandarmen jolyǵyp, jobanyń tehnologııalyq mánine nazar aýdardy. Jańa KTQ iske qosylǵannan keıin qalanyń sol jaq bóligindegi káriz sýlaryn tazartý problemasy sheshim tabady.
Qazir paıdalanyp júrgen káriz sýy "Sasyqsaı" býlaný alańyna jetkenge deıin tazartýdyń tolyq satysynan ótpeıdi, bul óz kezeginde sanıtarlyq-epıdemıologııalyq jaǵdaıǵa keri áserin tıgizedi.
Jobanyń bas merdigeri "Pavlodar ózen porty" AQ. Nysan qurylysy 2017 jyldyń qarasha aıynda bastaldy, bıyl jyl sońyna qaraı iske qosylady. Qazir merdiger qurylys-montajdaý jumystaryn josparly kesteden alda júrgizip jatyr.
«Bul mańyzdy nysan. Kóp jumys isteldi. Asyǵystyqtyń keregi joq, jumys jospar boıynsha júrýi tıis. Erekshe mańyzdy nysan sapaly salynýy kerek», - dedi Nurlan Noǵaev.
Oblys ákimi "Atyraý sý arnasy" basshylyǵyna qurylys barysynda belsendilik kórsetýdi tapsyrdy. Nysan keıin osy kommýnaldyq mekemege beriledi.
«Qurylys jumystary kezinde belsendilik tanytýlaryńyz kerek. Merdiger sizderdiń usynys-pikirlerińizdi esepke alýy tıis. Nysan paıdalanýǵa berilgennen keıin kidirissiz jumys isteýi kerek. Sizder mamansyzdar, sondyqtan eskertýlerińiz qurylys barysynda mańyzdy bolady. Aıtatyndaryńyz bolsa, ortaǵa salyńyzdar. Sol úshin, máselelerdi sheshý úshin jınalyp otyrmyz, - dep atap ótti oblys ákimi. - Ákimdiktegi basqarmalardan, merdiger, avtorlyq qadaǵalaý, tehnıkalyq baqylaý ókilderinen jumys tobyn qurý kerek. Bul úlken jumys, sondyqtan usaq-túıektiń bári eskerilýi qajet. Strategııalyq mańyzdy nysan qurylys bitkennen keıin iske qosylýy tıis».
Oblystyq qurylys basqarmasynyń basshysy Málik Amanovtyń aıtýynsha, tamyz-qazan aılary aralyǵynda iske qosý-retteý jumystary júrgiziledi. Jasalatyn jumys kóp. Biraq merdiger ózine júktelgen mindetti tolyq oryndaýy shart.
«Jobany júzege asyrý kóptegen ózekti máselelerdiń sheshimin taýyp, qalanyń ekologııalyq ahýalyn jaqsartady. Qala ákimine alǵa qaraı jeke sektordy osy júıege qosý máselesin sheshý týraly tapsyrma beriledi», - dep atap ótti Nurlan Noǵaev.
Aıta ketý kerek, jańa KTQ iske qosylǵannan keıin kóp jyldar boıy turǵyndardyń shaǵymyn týdyryp kelgen "Sasyqsaı" jabylady. Qalanyń sol jaq bóliginde tazartý qondyrǵysynyń bolmaýy qorshaǵan ortaǵa keri áserin tıgizedi. "Sasyqsaıdaǵy" tazartylmaǵan káriz sýy jerasty sýy men topyraqty, atmosferalyq aýany lastaıdy.
