Atyraýda jańa káriz sýyn tazartatyn keshen salynady
ASTANA. QazAqparat - Atyraýda káriz sýyn tazartý stansasy salynyp, «Sasyq saı» jabylady. Bul týraly búgin halyqqa esep berý jıynynda Atyraý qalasynyń ákimi Serik Shapkenov aıtty, dep habarlaıdy QazAqparat.
Óńirlik kommýnıkatsııalar qyzmetiniń málimetinshe, atalmysh nysan oblys ortalyǵynyń sol jaq bóliginiń káriz sýyn tazartý máselesin sheshedi. KTS aldaǵy jyly paıdalanýǵa beriledi dep kózdelip otyr.
Joba quny 10,1 mlrd teńge. Qalanyń sol jaq bóligindegi káriz sýyn tazartý qurylǵylary kesheni Atyraý qalasynyń ońtústik, ońtústik-shyǵys bóliginde ornalasady.
Bir aıta keterligi, ol paıdalanýǵa berilgennen keıin birneshe jyl boıy turǵyndar shaǵymdanyp kelgen «Sasyq saı» jabylady. Keshende bas káriz stansasy, sý tazartýshy qurastyrmaly kollektor, káriz sýyn tazartý qurylǵysy alańy, býlaný alańy men bıologııalyq toǵan alańy bolady.
Qurylys ótken jyldyń aıaǵynda bastaldy. Qazir nysannyń óndiristik, turmystyq ǵımarattar blogy, kólikjaı, aýaótkizgish stansa, jylý qazandyǵy, hlorlaý, laı sorý stansasy, drenaj sorǵysh stansasy salynyp, temirbetonmen qorshaldy, ótkel jol tóseldi.
Keshen táýligine 70 myń tekshe metr sý qabyldaı alady. Káriz sýyn tazartý kezeń-kezeńmen mehanıkalyq jáne bıologııalyq ádispen júrgiziledi.
«2016 jyly aımaq basshysy Atyraý qalasynyń sol jaq bóliginde káriz sýyn tazartý máselesin sheshýdi tapsyrdy,- dedi Serik Shapkenov. -Qurylys 1978 jyly salynǵan, sodan beri kúrdeli jóndeý jasalmaǵan. Aǵyn sý býlaný alańyna jetpes buryn tazartýdyń tolyq satysynan ótpeıdi. Bul turǵyndardyń narazylyǵyn týdyrdy, eger tótenshe jaǵdaı bolsa, túgel qala las sýdyń astynda qalar edi. Qazir osy túıtkildi sheship jatyrmyz, qalanyń oń jaq bóliginde KTS qurylysynyń jobalyq smeta qujattary jasalyp jatyr».
Aıta keteıik, 2016 jyly qarasha aıynda Atyraý oblysynyń ákimi Nurlan Noǵaev selektorlyq jınalysta káriz sýlarynyń sý tartý júıesiniń jaǵdaıyn jaılap áreket etetin «bombaǵa» teńep edi. Aımaq basshysy qala bıligine osy máseleni sheshýdi mindettegen.
