Atyraýda jańa bosanǵan áıeldiń ólimine kinálilerge shartty jaza taǵaıyndaldy
ATYRAÝ.QazAqparat - Atyraý qalalyq perzenthanasynyń jas bosanǵan áıeldiń ólimine kináli qyzmetkerlerine shartty jaza taǵaıyndaldy, dep habarlaıdy «QazAqparat» HAA tilshisi.
Perzenthana dárigerleri Janar Dáýitova, Nazgúl Muhanbetqalıeva jáne akýsher Aqmaral Sembıeva Atyraý oblysy Inder aýdanynyń 32 jasar turǵynynyń qazasyna kináli dep aıyptalyp otyr. Tekserý nátıjesinde áıel tolǵaǵy bastalǵan kezde perzenthanaǵa ózi kelgendigi anyqtaldy. Medıtsınalyq kómek ýaqytynda kórsetilmegendikten ol qaıtys bolǵan. Bala da aman qalmaǵan.
«Perzenthana qyzmetkerleri QR QK «Medıtsına qyzmetkerleriniń kásibı mindetterin tıisti deńgeıde oryndamaýynyń adam ólimine ákelýi» baby boıynsha aıyptaldy. Sotqa deıin aıyptalýshylar kinásin moıyndaý kelisimi túrinde jábirlenýshi tarappen protsessýaldyq kelisim jasasyp, qaıtys bolǵan áıeldiń otbasyna 10 mln teńge tóledi.
Sot Dáýitova men Muhambetqalıevaǵa eki jyl, Sembınovaǵa bir jyl bas bostandyǵynan aıyrý úkimin shyǵardy. Sonymen qatar, sot sheshimi boıynsha olar úsh jyl kóleminde medıtsına salasynda qyzmet etý quqyǵynan aıyryldy», - dep habarlady oblystyq sottyń baspasóz qyzmeti.
