Atyraýda jalpyqalalyq senbilikke 7 myńǵa jýyq adam qatysty

ATYRAÝ. QazAqparat - Atyraýda eki aılyq sanıtarlyq tazalyq naýqany bastaldy, dep habarlaıdy QazAqparat tilshisi qalalyq ákimdiktiń baspasóz qyzmetine silteme jasap. 

15 qyrkúıekte Atyraý qalasynda jalpyqalalyq senbilik ótti. Qalalyq TKSh bóliminiń málimeti boıynsha, qaladaǵy sanıtarlyq tazalyqqa 7 myńǵa jýyq qala jáne qala mańyndaǵy aýyldyq okrýg turǵyndary, sonyń ishinde 1125 memlekettik uıym men jeke mekemeler, ýnıversıtetter men kolledj stýdentteri qatysty.

Senbilik qorytyndysy boıynsha qalalyq polıgonǵa 730 tekshe metr qoqys tastaldy.

«Atyraý qalasy ákimdiginiń qaýlysyna sáıkes, aǵymdaǵy jyldyń 15 qyrkúıegi men 15 qarashasy aralyǵynda eki aılyq sanıtarlyq tazalyq jarııalandy. Osyǵan baılanysty biz barlyq qala turǵyndaryn, sondaı-aq memlekettik mekemeler men jeke uıymdardyń basshylaryn apta saıynǵy eki aılyq senbilikke belsene qatysýǵa shaqyramyz»,- deıdi Atyraý qalasy ákiminiń orynbasary Nurlan Taýbaev.