Atyraýda jalǵyzbasty zeınetkerdi kórshisi tonap ketken
ATYRAÝ. QazAqparat –Atyraýda 67 jastaǵy jalǵyzbasty zeınetkerdi tonaǵan kórshisi ustaldy, dep habarlaıdy QazAqparat.
«Tún ishinde kórshim páterime basa-kóktep kirip kelip, qylǵyndyrdy. Aqsha, bank kartasyn, telefonymdy talap etti. Ózi jumys istemeıdi, ishimdik ishkendi jaqsy kóretin jigit. Ómirime tóngen qaýipten qatty qoryqtym. Mobıldi telefonymdy, bank kartasyn berip qutyldym», - deıdi polıtsııaǵa aryzdanǵan Avangard-2 yqshamaýdanyndaǵy kóp qabatty úıde turatyn 67 jastaǵy zeınetker.
Kórshisinen zábir kórgen zeınetker esin jıyp, óz-ózine kelgen soń kórshileri arqyly polıtsııaǵa qońyraý shalǵan. Tártip saqshylary jábirlenýshiden tonaýshy týraly málimetti alyp, jan-jaqty izdestirýge kirisken.
«Polıtsııa jedel-izdestirý sharalaryn júrgizip, 29 jastaǵy kúdiktini ustady. Odan aıǵaq zattar alynyp, zeınetkerge qaıtaryldy. Qazir sotqa deıingi tergeý júrgizilip jatyr» -dep habarlady oblystyq polıtsııa departamentiniń baspasóz qyzmeti.
Eske sala ketelik, budan buryn Atyraýda áıelden 150 myń teńge bopsalaǵan turǵyn ustalǵan bolatyn.
